Fréttasafn

Á fundi bæjarráðs Garðabæjar í morgun, þann 26. mars 2019, var samþykkt að fela Sjómannadagsráði fyrir hönd Hrafnistu rekstur dagdvalar fyrir eldri borgara í þjónustumiðstöð hjúkrunarheimilisins Ísafoldar í Garðabæ. Hrafnista hefur rekið hjúkrunarheimilið Ísafold í Garðabæ frá 1. febrúar 2017. Hrafnista tekur formlega við rekstri dagdvalarinnar þann 1. apríl n.k. en skrifað var undir samning þess efnis í morgun.

Í dagdvöl Ísafoldar eru tuttugu rými, sextán almenn og fjögur fyrir einstaklinga með heilabilun. Markmiðið er að fjölga rýmum í áföngum í allt að þrjátíu á næstu misserum. Dagdvölin verður rekin samhliða starfsemi hjúkrunarheimilisins eins og verið hefur. Samningurinn gildir til 31. desember 2028.

Engar breytingar verða á starfsemi dagdvalarinnar við aðilaskiptin en stefnt er að því að með samlegðaráhrifum með rekstri hjúkrunarheimilisins skapist tækifæri til aukinnar hagræðingar og bættrar þjónustu.

Dagdvölin í Garðabæ verður fjórða dagdvölin sem við á Hrafnistu starfrækjum. Fyrir eru almennar dagdvalir í Hafnarfirði (26 rými) og í Boðaþingi (30 rými) auk dagþjálfunar í Laugarásnum (30 rými).

Í maí munum við svo opna í Laugarásnum nýja 30 rýma dagdvöl fyrir einstaklinga með heilabillun á deildinni Viðey sem hefur verið hjúkrunardeild hingað til.

Harpa Hrund Albertsdóttir hefur verið ráðin í tímabundið starf gæðastjóra Hrafnistuheimilanna, innan heilbrigðissviðs Hrafnistu, á meðan Nanna Guðný Sigurðardóttir fer í fæðingarorlof.

Harpa mun í samvinnu við framkvæmdastjóra heilbrigðissviðs bera ábyrgð á samræmingu og samþættingu á heilbrigðisþjónustu innan Hrafnistuheimilanna, ásamt innleiðingu og framkvæmd á samræmdri stefnu Hrafnistu. Hún mun einnig taka þátt í stefnumótun, markmiðasetningu og áætlanagerð sem snýr að Heilbrigðissviði Hrafnistu.

Nokkur af mörgum verkefnum Hörpu mun verða að halda utan um verklagsreglur Hrafnistu og þar með Gæðahandbók heimilanna, hafa umsjón ásamt öðrum starfsmönnum sviðsins með innra og ytra eftirliti og fylgja eftir úrbótum þar sem við á.

Harpa er hjúkrunarfræðingur að mennt og kemur frá Hrafnistu Ísafold, auk þess sem hún er fyrrum lögreglumaður. Hún hefur því viðtæka reynslu  á eftir að efla heilbrigðissvið Hrafnistu í þjónustu við deildir og aðra starfsemi Hrafnistuheimilanna.

Við bjóðum Hörpu velkomna inn á Heilbrigðissvið Hrafnistu.

Föstudaginn 15. mars sl. voru 5 ár frá því að Hrafnista Nesvellir í Reykjanesbæ opnuðu með pomp og prakt. Því var að sjálfsögðu fagnað og strax á föstudagsmorgun var lambahryggur settur í ofninn á öllum deildum svo að ilmurinn var ansi lokkandi í öllu húsinu. Í hádeginu var spiluð ljúf tónlist, dúkað upp og sparistellið lagt á borð og blásið til veislu. Lambahryggur með öllu tilheyrandi og ís í eftirrétt. Yndisleg samverustund sem allir nutu vel.

Það var heldur betur fjölmennt í leikfiminni á Hrafnistu Hraunvangi sl. föstudag. Í föstudags tímunum er svokallað ,,bland í poka’’ þar sem dregið er hvaða þema verður hverju sinni og eru tímarnir öðruvísi en vanalega. Á föstudaginn var spánarþema þar sem fólk var ýmist sumarklædd eða með sumarskraut. Það var svakalegt stuð, bæði sungið og dansað.

Meðfylgjandi myndir voru teknar í föstudagsleikfiminni. 

Þann 12. mars sl. kom Suðurhlíðarskóli í heimsókn á Hrafnistu Hraunvangi Hafnarfirði. Krakkarnir skiptust á að syngja og spila á píanóið. Þetta var mjög skemmtileg heimsókn og þökkum við þeim kærlega fyrir komuna.

Eftir hádegið var svo opnunarsýning á málverkum eftir Sævar og Söru, en þau eru bæði í dagdvöl á heimilinu. Skálað var í bleikum drykk og barnabarn Sævars söng fyrir gesti. Að lokum tók Guðmundur heimilismaður lag í lokin.

Málfríður Arna Arnórsdóttir, sjúkraliði á Sjávar- og Ægishrauni Hrafnistu Hraunvangi, hefur starfað á Hrafnistu í 10 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri:  Hjördís Ósk Hjartardóttir, Lilja Björgvinsdóttir sem átti 5 ára  starfsafmæli, Málfríður, Pétur Magnússon forstjóri og Árdís Hulda Eiríksdóttir forstöðumaður Hrafnistu Hraunvangi.

Thomas Meuser forstjóri „Center for Excellence in Aging and Health at the University of New England in Portland, Maine, USA“ hélt fyrirlestur fyrir starfsfólk Hrafnistu í dag. Thomas er sálfræðingur að mennt og hefur sérhæft sig í öldrunarfræðum. Fyrirlestur hans var um arfleifð og kynslóðir: „Legacy Beliefs across Generations: Perspectives on Family Sharing.“

Það var góð mæting og frábærar umræður, hér eru nokkrar myndir og einnig skilgreining Toms um arfleifð (legacies): 
„All people have meaningful impacts on the lives of others and the world around them. Some of these impacts live on after death; these are called legacies.“

Sonja Sigríður Gylfadóttir, starfsmaður í borðsal og eldhúsi Hrafnistu Hraunvangi Hafnarfirði, hefur starfað á Hrafnistu í 10 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri:  Árdís Hulda Eiríksdóttir forstöðumaður Hrafnistu Hraunvangi, Hrönn Benediktsdóttir deildarstjóri í borðsal og eldhúsi, Sonja Sigríður og Pétur Magnússon forstjóri Hrafnistu.