Fréttasafn

Þorrablót Hrafnistu Hraunvangi í Hafnarfirði var haldið fimmtudaginn 31. janúar s.l. Kokkar Hrafnistu báru fram hinn sígilda þorramat, Guðrún Árný söngkona sá um veislustjórn, Böðvar Magnússon spilaði á flygilinn undir borðhaldi og á harmonikkuna í hópsöng.
Heimilisiðnaðarfélagið var með kynningu og sýndi  glæsilega þjóðbúninga, Soffía Egilsdóttir félagsráðgjafi fór með minni karla og Oddgeir rekstrarstjóri Hrafnistu fór með minni kvenna. Harmonikkufélag Suðurnesja spilaði svo fyrir dansi á dansiballi sem fram fór eftir borðhaldið. Það er óhætt að segja að kvöldið hafi heppnast einstaklega vel og skemmti fólk sér vel.

Flestir hafa heyrt talað um Alla Rúts, siglfirska braskaran, skemmtikraftinn og prakkaran en eftir honum var meðal annars hin fræga bílasala „Bílasala Alla Rúts“ einmitt nefnd svo dæmi séu tekin.

Á dögunum færði hann Hrafnistuheimilunum nokkur eintök af ævisögu sinni sem Helgi Sigurðsson sagnfræðingur og dýralæknir tók saman en Alli Rúts hefur síðustu ár rekið hótel og veitingastað í Mosfellsbæ.

Eru Alla Rúts færðar kærar þakkir fyrir gjöfina.

Meðfylgjandi mynd var tekin þegar Alli Rúts færði Pétri Magnússyni forstjóra Hrafnistuheimilanna eintök af ævisögu sinni.

Íbúar, gestir og starfsfólk í Boðaþingi blótuðu þorra á bóndadaginn sl. föstudag að fornum sið. Dagurinn byrjaði á því að tveir íbúar á Hrafnistu í Boðaþingi fóru í heimsókn á leikskólann Austurkór, þar sem þeir fræddu börnin um gamla tíma. Það sem börnunum fannst merkilegast var að þeir skyldu ekki hafa getað farið í bíó og það hafi ekki verið hægt að ýta á takka til að kveikja ljós. Þetta var frábær heimsókn þar sem mikil vinátta myndaðist þó aldursmunurinn væri þó nokkur.

Í hádeginu mætti Svenni með harmonikkuna og fór á milli deilda ásamt Pétri forstjóra og fríðu föruneyti. Hópurinn tók lagið yfir borðhaldinu sem var með hefðbundnu sniði. Íbúar og gestir tóku vel undir og skemmtu sér vel.

Oddfellowstúkan nr. 5, Þórsteinn, stendur fyrir stórtónleikum hins rússneska Terem-kvartetts í Eldborgarsal Hörpu sunnudaginn 12. maí 2019 kl. 16:00. Gestasöngvarar eru Diddú og Kristinn Sigmundsson. Miðapantanir fara fram á harpa.is eða í síma 528 5050. 

Allur ágóði af tónleikunum rennur óskertur til líknarmála.

Sjá nánari auglýsingu hér

Þorrablót Hrafnistu Laugarási var haldið á bóndadaginn, föstudaginn 25.janúar sl., við mikinn fjölda íbúa og þeirra gesta. Þorrablótið hófst kl. 17:00 þar sem veislustjóri kvöldsins Guðrún Árný Karlsdóttir hélt uppi stuðinu með söng og gamni. Minni kvenna var í höndum Oddgeirs Reynissonar framkvæmdarstjóra rekstrarsviðs og minni karla tók Guðrún Árný að sér. Eftir skemmtunina gæddu allir sér  á gómsætum þorramat og Bragi Fannar harmonikkuleikari spilaði undir borðhaldi. Skemmtuninni var sjónvarpað á Hrafnisturásinni svo þeir íbúar sem treystu sér ekki til að koma í Skálafell gátu fylgst með í setustofum ásamt því að borða þorramat á deildum.

Morgunblaðið var með skemmtilega umfjöllun um þorrablótið inn á mbl.is 

https://www.mbl.is/frettir/innlent/2019/01/25/thorranum_fagnad_med_thjodlegum_rettum/?fbclid=IwAR1VtrJDOfSvHmusumwQyoPG4gEMQIV4Od76UPe_FakK7abkxuyUDzM7wjk

Mjög vel heppnað og ánægjulegt kvöld á Hrafnistu eins og myndir sýna.

Þorrablót Hrafnistu Nesvöllum verður haldið í hádeginu föstudaginn 1. febrúar nk.

Harmonikkufélag Suðurnesja spilar undir borðhaldi.

Verð fyrir gesti er kr. 4.000.-

Sjá nánari auglýsingu hér

Þorrablót Hrafnistu Hlévangi verður haldið í hádeginu fimmtudaginn 31. janúar nk.

Bragi Fannar, harmonikkuleikari spilar undir borðhaldi.

Verð fyrir gesti er kr. 4.000.-

Sjá nánari auglýsingu hér

Fullt var út að dyrum í Skálafell á Hrafnistu Laugarási þegar baritónsöngvarinn Bergþór Pálsson og Anna Guðný Guðmundsdóttir píanóleikar héldu stórtónleika þar í gær við mikinn fögnuð viðstaddra.

Fyrir tónleikana fór fram afhending á merkilegri hópmynd sem tekin var sl. sumar á Hrafnistu Laugarási en þar átti sér stað einstakur viðburður í Íslandssögunni þann 19. júlí 2018 þegar Afmælisnefnd aldarafmælis fullveldis Íslands og Hrafnista buðu öllum Íslendingum, fæddum 1918 og fyrr, til hátíðarsamkomu í tilefni aldarafmælis sjálfstæðis og fullveldis Íslands. 64 einstaklingar, búsettir um land allt, fengu boð í veisluna. Úr þessum hópi „fullveldisbarna“ mættu 22 einstaklingar til leiks ásamt gestum sínum og íbúum á Hrafnistu íLaugarási þar sem hátíðarsamkoman fór fram. Þetta er í fyrsta skipti í sögu þjóðarinnar þar sem öllum Íslendingum 100 ára og eldri hefur verið boðið sérstaklega að vera á sama stað á sama tíma. Forseti Íslands, Guðni Th. Jóhannesson ávarpaði samkomuna og listamenn skemmtu gestum í anda fullveldisársins 1918. Í veislunni var meðal annars boðið upp á fullveldisköku sem Landssamband bakarameistara setti saman en hún var byggð á vinsælum uppskriftum frá 1918.

Margrét Hallgrímsdóttir Þjóminjavörður veitti myndinni viðtöku og Ragnheiður Jóna Ingimarsdóttir framkvæmdastjóri mætti fyrir hönd afmælisnefndar þar sem Hrafnista og afmælisnefndin afhentu Þjóðminjasafninu eintak af þessari merkilegu mynd.