Fréttasafn

Svanhvít Guðmundsdóttir sjúkraliði verður deildarstjóri dagdvalar á Hrafnistu Ísafold frá mánudeginum 1. apríl nk.  Svanhvít útskrifaðist sem sjúkraliði í desember 2001 og vann þá á Hrafnistu Hraunvangi til ársins 2012. Svanhvít hefur starfað á Ísafold frá árinu 2014 og frá 2018 sem verkstjóra sjúkraliði á Snæfelli og Ásbyrgi. Við bjóðum Svanhvíti velkomna í stjórnendahóp Hrafnistu.

Í gær var haldið annað Lions bingóið á árinu. Það voru Lions klúbbarnir Ásbjörn og Kaldá sem héldu utan um og stjórnuðu því. Glæsilegir vinningar voru í boði. Sumir voru þó heppnari en aðrir og unnu oftar en einu sinni. Það fór samt engin tómhentur heim því allir fengu pakka af súkkulaðirúsínum að gjöf í lokin. Við þökkum Lionsklúbbunum kærlega fyrir komuna og okkur.

Í morgun kom skólakórinn McLean high school chours í heimsókn á Hrafnistu Hraunvang í Hafnarfirði. Skólakórinn kemur frá Washington í Bandaríkjunum og sungu þau fjölbreytt lög, meðal annars frá Spáni, Japan, Afríku og Ástralíu. Það var virkilega gaman að fá þau í heimsókn og þökkum við þeim kærlega fyrir komuna.

Hægt er að hlýða á kórinn með því að smella á linkinn hér fyrir neðan:

https://www.facebook.com/handverksheimili/videos/346740212853112/

Framundan eru breytingar í hópi æðstu stjórnenda Hrafnistuheimilanna.

Rebekka Ingadóttir, Anný Lára Emilsdóttir og Valgerður K. Guðbjörnsdóttir hafa verið ráðnar í stöður forstöðumanna á Hrafnistu og Dagný Jónsdóttir í nýja stöðu hjúkrunardeildarstjóra.




 

Rebekka verður forstöðumaður Hrafnistu Skógarbæjar

Eins og kynnt var á þriðjudag hefur nú verið ákveðið að Hrafnista taki við rekstri hjúkrunarheimilisins Skógarbæjar í Reykjavík frá og með 1. maí næstkomandi. Rebekka Ingadóttir hefur verið ráðin forstöðumaður heimilisins. Skógarbær hóf starfsemi árið 1997 og er heimili með 81 hjúkrunarrými, þar af eru nokkur sérstök rými fyrir unga íbúa. Rebekka lauk BS prófi í hjúkrunarfræði frá Háskólanum á Akureyri árið 2008. Hún hefur unnið á Hrafnistu í tæp 10 ár, fyrst í aðhlynningu með menntaskóla og svo frá árinu 2010 á Hrafnistu Boðaþingi. Þar byrjaði hún sem almennur hjúkrunarfræðingur, tók svo við stöðu aðstoðardeildarstjóra árið 2011 og hefur svo starfað sem deildarstjóri frá árinu 2013. Rebekku bíður spennandi verkefni að tengja Skógarbæ inn í Hrafnistufjölskylduna.

Anný Lára verður forstöðumaður Hrafnistu Boðaþingi

Anný Lára Emilsdóttir hefur verið ráðin forstöðumaður Hrafnistu Boðaþingi frá og með 1. maí. Anný Lára er með meistarapróf í hjúkrun frá Háskóla Íslands og sérfræðileyfi í öldrunarhjúkrun. Hún hefur starfað við öldrunarþjónustu í rúm 20 ár, bæði á hjúkrunarheimilum, við heimahjúkrun og á Landspítalanum. Hún hóf störf á Hrafnistu fyrir tæpum fjórum árum þegar hún tók við deildarstjórastöðu á Báruhrauni, Hraunvangi. 

Anný Lára mun taka við krefjandi starfi á einu vinsælasta hjúkrunarheimili landins. Vonast er til að hönnun viðbyggingar við hjúkrunarheimilið hefjist á þessu ári en til stendur að bæta loks seinni áfanga við húsnæðið (64 rýmum) þannig að heimilið verði 108 rýma hjúkrunarheimili í lok framkvæmdatíma, sem verður vonandi innan mjög fárra ára. Anný mun leiða Hrafnistu í þessum breytingum ásamt því að  tengja núverandi starfsemi við komandi stækkun og breytingar sem því tengjast.
 

Valgerður verður forstöðumaður Hrafnistu Sléttuvegi

Valgerður Kristín Guðbjörnsdóttir hefur verið ráðin forstöðumaður Hrafnistu Sléttuvegar frá og með 1. maí. Valgerður hefur stúdendtpróf af sjúkraliðabraut, er hjúkrunarfræðingur frá Háskóla Íslands og hefur lokið diplóma gráðu í opinberri stjórnsýslu fyrir stjórnendur í heilbrigðisþjónustu. Hún starfaði fyrst á Kleppsspítala en hefur unnið nánast óslitið á Hrafnistu í Laugarási síðan árið 2002. Fyrst sem almennur hjúkrunarfræðingur (2004-2007), svo aðstoðardeildarstjóri (2007-2013) og loks sem deildarstjóri á Miklatorgi frá janúar 2013.

Valgerðar býður spennandi starf en eins og kunnugt er rýs nú nýtt 99 rýma hjúkrunarheimili við Sléttuveg í Fossvogi í Reykjavík. Áætlað er að heimilið hefji starfsemi um næstu áramót en til þess að svo megi verða þarf að vinna hratt og vel, fjöldamörg handtök við undirbúning. Ber þar sjálfsagt hæst ráðining á hátt í 200 starfsmönnum og skipulag starfseminnar sem þarf auðvitað að liggja fyrir þegar fyrstu íbúarnir flytja inn.
 

Dagný verður hjúkrunardeildarstjóri á Hrafnistu Sléttuvegi

Dagný Jónsdóttir hefur verið ráðin hjúkrunardeildarstjóri Hrafnistu Sléttuvegi. Dagný hóf störf á Hrafnistu árið 2004 og starfaði sem sjúkraliði bæði á Vífilsstöðum og í Boðaþingi. Hún útskrifaðist sem hjúkrunarfræðingur frá Háskólanum á Akureyri árið 2014. Árið 2016 var hún ráðin aðstoðardeildarstjóri á Hrafnistu Laugarási og síðar sama ár tók hún við deildarstjórastöðu á nýsameinaðri hjúkrunardeild Sólteigs og Mánateigs í Laugarásnum. Dagný tekur við starfi sínu á Sléttuvegi í september og kemur þá í hópinn með Valgerði.




 

Sjálfseignastofnunin Skógarbær, sem á og rekur samnefnt hjúkrunarheimili við Árskóga í Reykjavík, hefur undirritað samning við Sjómannadagsráð, eiganda Hrafnistu, um að Hrafnista taki formlega við rekstri hjúkrunarheimilisins þann 2. maí næstkomandi. Rekstur og skuldbindingar starfseminnar munu áfram hvíla hjá Skógarbæ, en Hrafnista tekur yfir að stjórna og reka hjúkrunarheimilið.

Í dag og á næstunni verða haldnir kynningarfundir fyrir starfsfólk, heimilisfólk og aðstandendur vegna breytinganna þar sem starfsemi og hugmyndafræði Hrafnistu verður kynnt. Mannauðsstefna Hrafnistu mun gilda í Skógarbæ líkt og á öðrum Hrafnistuheimilum og engin breyting verður á ráðningarsambandi við starfsfólk sem áfram verður við Skógarbæ. Starfseminni verður háttað í samræmi við hugmyndafræði Hrafnistu þar sem áhersla er lögð á andlega, líkamlega og félagslega vellíðan íbúanna.

Rebekka Ingadóttir, sem stýrt hefur málum Hrafnistu í Boðaþingi undanfarin ár, hefur verið ráðinn forstöðumaður Skógarbæjar frá 1. maí.

Á samningstímabilinu, sem er til að byrja með til ársloka 2020, verður Hrafnista Skógarbæ sjálfstæður hluti rekstrarsamstæðu Sjómannadagsráðs. Í samningnum felst einnig nýting og rekstur á hluta af húsnæði félagsmiðstöðvarinnar Árskóga sem samtengd er hjúkrunarheimilinu og rekin er af Reykjavíkurborg að hluta. Við lok núgildandi samningstíma endurnýjast samningurinn sjálfkrafa til tveggja ára í senn þar til nýr samningur hefur verið undirritaður eða honum sagt upp með samningsbundnum fyrirvara.

Skógarbær er hjúkrunarheimili skammt frá Mjódd í Reykjavík, stofnsett árið 1997 með 81 hjúkrunarrými. Þar er meðal annars sérstök þjónusta fyrir unga hjúkrunaríbúa. Aðilar og stofnendur að sjálfseignarstofnuninni eru Reykjavíkurborg, Rauði Krossinn í Reykjavík og Efling stéttarfélag.

Skógarbær verður sjöunda Hrafnistuheimilið.

Á fundi bæjarráðs Garðabæjar í morgun, þann 26. mars 2019, var samþykkt að fela Sjómannadagsráði fyrir hönd Hrafnistu rekstur dagdvalar fyrir eldri borgara í þjónustumiðstöð hjúkrunarheimilisins Ísafoldar í Garðabæ. Hrafnista hefur rekið hjúkrunarheimilið Ísafold í Garðabæ frá 1. febrúar 2017. Hrafnista tekur formlega við rekstri dagdvalarinnar þann 1. apríl n.k. en skrifað var undir samning þess efnis í morgun.

Í dagdvöl Ísafoldar eru tuttugu rými, sextán almenn og fjögur fyrir einstaklinga með heilabilun. Markmiðið er að fjölga rýmum í áföngum í allt að þrjátíu á næstu misserum. Dagdvölin verður rekin samhliða starfsemi hjúkrunarheimilisins eins og verið hefur. Samningurinn gildir til 31. desember 2028.

Engar breytingar verða á starfsemi dagdvalarinnar við aðilaskiptin en stefnt er að því að með samlegðaráhrifum með rekstri hjúkrunarheimilisins skapist tækifæri til aukinnar hagræðingar og bættrar þjónustu.

Dagdvölin í Garðabæ verður fjórða dagdvölin sem við á Hrafnistu starfrækjum. Fyrir eru almennar dagdvalir í Hafnarfirði (26 rými) og í Boðaþingi (30 rými) auk dagþjálfunar í Laugarásnum (30 rými).

Í maí munum við svo opna í Laugarásnum nýja 30 rýma dagdvöl fyrir einstaklinga með heilabillun á deildinni Viðey sem hefur verið hjúkrunardeild hingað til.

Harpa Hrund Albertsdóttir hefur verið ráðin í tímabundið starf gæðastjóra Hrafnistuheimilanna, innan heilbrigðissviðs Hrafnistu, á meðan Nanna Guðný Sigurðardóttir fer í fæðingarorlof.

Harpa mun í samvinnu við framkvæmdastjóra heilbrigðissviðs bera ábyrgð á samræmingu og samþættingu á heilbrigðisþjónustu innan Hrafnistuheimilanna, ásamt innleiðingu og framkvæmd á samræmdri stefnu Hrafnistu. Hún mun einnig taka þátt í stefnumótun, markmiðasetningu og áætlanagerð sem snýr að Heilbrigðissviði Hrafnistu.

Nokkur af mörgum verkefnum Hörpu mun verða að halda utan um verklagsreglur Hrafnistu og þar með Gæðahandbók heimilanna, hafa umsjón ásamt öðrum starfsmönnum sviðsins með innra og ytra eftirliti og fylgja eftir úrbótum þar sem við á.

Harpa er hjúkrunarfræðingur að mennt og kemur frá Hrafnistu Ísafold, auk þess sem hún er fyrrum lögreglumaður. Hún hefur því viðtæka reynslu  á eftir að efla heilbrigðissvið Hrafnistu í þjónustu við deildir og aðra starfsemi Hrafnistuheimilanna.

Við bjóðum Hörpu velkomna inn á Heilbrigðissvið Hrafnistu.

Föstudaginn 15. mars sl. voru 5 ár frá því að Hrafnista Nesvellir í Reykjanesbæ opnuðu með pomp og prakt. Því var að sjálfsögðu fagnað og strax á föstudagsmorgun var lambahryggur settur í ofninn á öllum deildum svo að ilmurinn var ansi lokkandi í öllu húsinu. Í hádeginu var spiluð ljúf tónlist, dúkað upp og sparistellið lagt á borð og blásið til veislu. Lambahryggur með öllu tilheyrandi og ís í eftirrétt. Yndisleg samverustund sem allir nutu vel.