Fréttasafn

Þriðjudaginn 22. nóvember sl. voru veitt verðlaun í jólakortasamkeppni Hrafnistuheimilanna.

Þetta er í 11 skipti sem valin er jólamynd frá íbúum eða þjónustuþegum Hrafnistu. Fjölmargar tillögur bárust og voru þær frá Hrafnistu í Reykjavík og Hafnarfirði. Við þökkum öllum þeim sem tóku þátt kærlega fyrir þátttökuna.

Það var erfitt val hjá dómnefndinni í ár en í henni sitja Leifur Breiðfjörð myndlistarmaður, Sigríður G. Jóhannsdóttir vefnaðarkennari og Guðný M. Magnúsdóttir myndlistarmaður. Okkar innilegustu þakkir til dómnefndar fyrir vel unnin störf og þess má geta að þau eru okkar fasta dómnefnd. Leifur og Sigríður hafa verið frá upphafi í dómnefndinni og Guðný kom svo inn sem gestadómari og búin að vera síðastliðin 3 ár.

Jólakort Hrafnistuheimilanna 2016 er eftir Elínbjörgu Kristjánsdóttur f. 28. júlí 1933 sem búsett í þjónustuíbúð við Hrafnistu í  Hafnarfirði. Við óskum henni innilega til hamingju með þessa fallegu og hugljúfu jólamynd.

Kortið er prentað í yfir 4000 eintökum og  sent til allra íbúa og starfsmanna Hrafnistu sem og annarra sem tengjast heimilunum.

Við höfum fengið óskir um það síðastliðin ár að jólakortið sé haft til sölu. Það er nú til sölu í kaupfélögum Hrafnistu í Reykjavík og Hafnarfirði og kostar kortið 200,- kr. stykkið.

Ágóðinn af jólakortinu rennur til iðjuþjálfunar á Hrafnistuheimilunum og nýtist t.d.  í félagsstarf, námskeið eða fræðslu fyrir íbúa heimilanna.

Meðfylgjandi eru myndir frá verðlaunaafhendingunni.

Aðventuguðsþjónusta verður haldin sunnudaginn 27. nóvember kl. 11:00 í Menningarsalnum 1. hæð, Hrafnistu Hafnarfirði.

Hrafnistukórinn syngur undir stjórn Böðvars Magnússonar.

Prestur: sr. Svanhildur Blöndal.

Sjá nánari auglýsingu með því að smella hér

Aðventumessa verður haldin sunnudaginn 27. nóvember kl. 14:00 í Helgafelli 4. hæð, Hrafnistu Reykjavík.

Organisti:Magnús Ragnarsson

Kór:Félagar úr Kammerkór Áskirkju og söngfélagar Hrafnistu.

Prestur:Svanhildur Blöndal

Sjá nánari auglýsingu með því að smella hér

Alzheimer kaffi verður haldið fimmtudaginn 1. desember nk. kl. 17:00 að Hæðargarði 31.

Edda Andrésdóttir, fréttamaður og rithöfundur, les úr bók sinni Í öðru landi sem fjallar um það hvernig Alzheimer sjúkdómurinn náði tökum á föður hennar.

Alzheimerkaffi er fyrir fólk með alzheimer eða aðra minnissjúkdóma og aðstandendur þeirra

Markmiðið er að gefa fólki tækifæri til að koma saman, opna umræðuna um erfiðleika fólks með þennan sjúkdóm og gefa þeim og aðstandendum kost á að hitta aðra sem glíma við svipaðan vanda.

Einnig að veita ráðgjöf, fræðslu, spjalla, syngja, gleðjast og eiga gæðastundir. 

Aðgangseyrir 500 kr.

Boðið er uppá kaffi og meðlæti.

Allir velkomnir!

Föstudaginn 18. nóvember nk. verður Steinunn Leifsdóttir, íþróttafræðingur, með fræðslu í Helgafelli, 4. hæð Hrafnistu í Reykjavík kl. 13:30.

Fræðsluerindi: Næring eldra fólks.

Ólöf B. Sveinsdóttir, starfsmaður í aðhlynningu á Ölduhrauni Hrafnistu í Hafnarfirði, hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Calsilita V. Snorrason, félagsliði á Bylgjuhrauni Hrafnistu í Hafnarfirði, hefur starfað á Hrafnistu í 10 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Sóley Ösp Vilhjálmsdóttir hjúkrunarfræðingur hefur verið ráðin aðstoðardeildarstjóri á Hrafnistu Kópavogi. Sóley útskrifaðist sem hjúkrunarfræðingur frá HÍ 2008 og hefur starfað við hjúkrun síðan. Hún hefur góða reynslu af öldrunarhjúkrun og hefur bæði starfað á hjúkrunarheimilum hér heima og í Danmörku. Áður en Sóley hóf störf sem hjúkrunarfræðingur á Hrafnistu Kópavogi í mars 2016 starfaði hún á vöknun (12-A) og gjörgæsludeild (12-B) á Landspítalanum.

Við bjóðum Sóley Ösp velkomna í stjórnendahóp Hrafnistu.