Fréttasafn

Hrafnistu í Hafnarfirði barst nýlega höfðingleg  gjöf. Um er að ræða 5 flutningshjólastóla sem gefnir eru af aðilum sem eiga aðstandendur á heimilinu. Stólarnir verða til taks á hverri hæð og verða meðal annars nýttir til að auðvelda íbúum að sækja sér þá þjónustu og  viðburði sem í boði eru á heimilinu.

Stólarnir eru XS Aluminium krossramma hjólastólar, bólstraðir með stillanlegum bakdúk, uppfellanlegum örmum sem hægt er að dýptarstilla, hraðlosun á hjólum, veltivörn, 5 cm sessu, mjaðmabelti og tvískiptum fótahvílum þar sem hægt er að stilla fótplötu og eins að taka hana af.

Hrafnista þakkar þessum aðilum fyrir hlýhug og frábæra gjöf sem á eftir að nýtast íbúum heimilisins vel.

Í dag, föstudaginn 14. október, er Bleiki dagurinn í hávegum hafður á öllum Hrafnistuheimilunum þar sem heimilin hafa verið skreytt með bleiku hátt og lágt og heimilisfólk og starfsfólk klæðist bleiku í tilefni dagsins.

Í gærkvöldi var haldinn haustfagnaður á Hrafnistu Hlévangi Reykjanesbæ. Þórhallur Sigurðsson sá um veislustjórn og glatt var á hjalla eins og vill stundum gerast þegar Laddi er annars vegar.

Meðfylgjandi myndir frá haustfagnaðinum tala sínu máli.

Föstudaginn 14. október nk. verður sýnd fræðslumynd í Helgafelli, 4. hæð Hrafnistu í Reykjavík kl. 13:30.

Sýnd verður upptaka frá tónleikum Sinfóníuhljómsveitar Íslands ásamt Eivöru Pálsdóttur og Ragnheiði Gröndal. Tónleikarnir báru yfirskriftina „Manstu gamla daga“.

Hrönn Önundardóttir hefur verið ráðin hjúkrunardeildarstjóri á Ölduhrauni Hrafnistu Hafnarfirði.

Hrönn lauk B.Sc. prófi í hjúkrunarfræði frá Háskóla Íslands árið 1996 og diplómagráðu í starfstengdri siðfræði frá sama skóla árið 2006. Árið 2015-2016  stundaði hún nám í  verkefnastjórnun og leiðtogaþjálfun á vegum símenntunar Háskólans á Akureyri og VogL.

Hrönn gegndi stöðu hjúkrunarforstjóra á dvalar- og hjúkrunarheimilinu Uppsölum á Fáskrúðsfirði frá árinu 2011 til 2016, en tekur nú við stöðu hjúkrunardeildarstjóra Ölduhrauns þann 5. nóv. n.k.

Við bjóðum Hrönn hjartanlega velkomna til starfa á Hrafnistu.

Októbermánuður er tileinkaður Bleiku slaufunni, árveknis- og fjáröflunarátaki Krabbameinsfélags Íslands gegn krabbameinum hjá konum.

Undanfarin ár hefur Bleiki dagurinn notið sívaxandi vinsælda í hinum bleika októbermánuði. Í ár er hann haldinn föstudaginn 14. október nk. Þennan dag eru allir landsmenn hvattir til að sýna samstöðu, klæðast bleiku og hafa bleikt í fyrirrúmi.

Hrafnistuheimilin leggja svo sannarlega sitt af mörkum því þessa dagana er starfsfólk í óða önn að færa heimilin í bleikan búning og skreyta með ýmsu bleiku. Að sjálfsögðu höldum við svo upp á Bleika daginn með formlegum hætti með því að hvetja heimilisfólk og starfsfólk á Hrafnistu til að taka þátt og klæðast einhverju bleiku þennan dag.

Ólína Bjarnadóttir, sjúkraliði á Ölduhrauni Hrafnistu Hafnarfirði, hefur starfað á Hrafnistu í 10 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri: Þóra Gunnlaugsdóttir deildarstjóri á Ölduhrauni, Ólína og Pétur Magnússon forstjóri Hrafnistu.

Nilanka I. Dewage, starfsmaður í býtibúri á Ölduhrauni Hrafnistu Hafnarfirði, hefur starfað á Hrafnistu í 15 ár. 

Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri: Pétur Magnússon forstjóri Hrafnistu, Árdís Hulda Eiríksdóttir forstöðumaður Hrafnistu í Hafnarfirði, Nilanka og Þóra Gunnlaugsdóttir deildarstjóri á Ölduhrauni.