Bergdís A. Kristjánsdóttir, sjúkraliði á Sjávar- og Ægishrauni Hrafnistu Hraunvangi í Hafnarfirði, hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.
Á meðfylgjandi mynd eru frá vinstri: Árdís Hulda Eiríksdóttir forstöðumaður Hrafnistu Hraunvangi, Hjördís Ósk Hjartardóttir hjúkrunardeildarstjóri á Sjávar- og Ægishrauni, Bergdís, Sveindís Skúladóttir aðstoðarhjúkrunardeildarstjóri og Pétur Magnússon forstjóri Hrafnistu.
Pranom Janchoo, starfsmaður í aðhlynningu á Lækjartorgi Hrafnistu Laugarási í Reykjavík, hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.
Á meðfylgjandi mynd eru frá vinstri: Pétur Magnússon forstjóri Hrafnistu, Pranom og Eygló Tómasdóttir hjúkrunardeildarstjóri á Lækjartorgi.
Góðir gestir heimsóttu dagþjálfunardeildina Viðey á Hrafnistu Laugarási í vikunni þegar nokkrir galvaskir aðilar frá Slökkviliðinu á höfuðborgarsvæðinu kíktu við. Tilefni heimsóknarinnar var að veita formlega viðtöku á böngsum sem gestir okkar í dagþjálfun hafa unnið hörðum höndum við að prjóna fyrir þau börn sem eru svo óheppin að lenda í sjúkrabíl, en þau börn fá einn bangsa að gjöf frá okkar fólki.
Gestir í dagdvölinni á Hrafnistu Ísafold brugðu sér í haustferð að dögunum. Ferðinni var heitið í Reykholt í Bláskógarbyggð að heimsækja Friðheima en þar eru ræktaðir tómatar allan ársins hring í raflýstum gróðurhúsum. Knútur Rafn eigandi Friðheima tók vel á móti hópnum og fræddi þau um hvernig tómatræktunin gengur fyrir sig og eftir það fékk hópurinn sér að snæða á veitingastaðnum sem staðsettur er í gróðurhúsinu en þar er m.a. boðið upp á tómatsúpu og nýbakað brauð innan um plönturnar.
Elsa Björg Árnadóttir hefur verið ráðin aðstoðardeildarstjóri á Hrafnistu Sléttuvegi. Hún útskrifaðist sem hjúkrunarfræðingur B.Sc frá Háskóla Íslands árið 2017. Hún vann á Kvennadeild Landspítalans í eitt ár með námi en hún hefur starfað á Hrafnistu Hraunvangi frá árinu 2013 í aðhlynningu, sem hjúkrunarnemi og sem hjúkrunarfræðingur frá útskrift.
Við óskum Elsu Björgu innilega til hamingju með stöðuna og bjóðum hana hjartanlega velkomna í stjórnendahóp á Hrafnistu Sléttuvegi.
Sigrún Alda Kjærnested hefur verið ráðin sem deildarstjóri í borðsal á Hrafnistu Sléttuvegi.
Sigrún útskrifaðist sem hárgreiðslumeistari frá Iðnskólanum í Reykjavík árið 1986 og vann sem slíkur til ársins 2000. Starfaði hún sem skólaliði og á leikskóla og vann við ýmis veilsuþjónustustörf. Var hún þjónustustjóri hjá Ölgerð Egils Skallagrímssonar í 6 ár en hóf störf hjá Hrafnistu árið 2012 og tók við sem deildarstjóri borðsals á Hrafnistu í Laugarás það sama ár.
Við óskum Sigrúnu til hamingju með stöðuna og bjóðum hana hjartanlega velkomna til liðs við starfsmannahópinn á Hrafnistu Sléttuvegi.
Sunnudaginn 3. nóvember sl. var Guðsþjónusta haldin í samkomusalnum í Helgafelli á Allraheilagramessu sem er þakkar og minningardagur þeirra sem látin eru. Í messunni söng Anna Sigríður Helgadóttir mezzósópran eftirminnilega fallegu lögin Allsherjar Drottinn og Hvert örstutt spor. Anna Sigríður hefur tekið þátt í margskonar tónlistarflutningi, eins og einsöngstónleikum, óperu og óperettuuppfærslum, gospeltónleikum og djasstónleikum. Hún hefur komið víða fram, bæði hér heima og einnig erlendis. Söngfélaganir Jón Helgason, Þórunn Guðmundsdóttir og Kristín Guðjónsdóttir leiddu safnaraðarsöng. Kristín las einnig ritningarlestur. Organisti var Bjartur Logi Guðnason. Sr. Svanhildur Blöndal prédikaði og þjónaði fyrir altari.
Þriðjudaginn 12. nóvember nk. standa Samtök fyrirtækja í velferðarþjónustu, Læknafélag Reykjavíkur, Félag sjúkraþjálfara, Samtök heilbrigðisfyrirtækja og Tannlæknafélag Íslands fyrir málþingi sem ber heitið Annmarkar við kaup ríkisins á heilbrigðisþjónustu. Málþingið verður haldið á hótel Reykjavík Natura kl. 13.30 – 16.00.
Allir velkomnir og aðgangur er ókeypis.
Dagskrá málþingsins má skoða með því að smella hér
Í tilefni opinberrar umfjöllunar um málefni íbúa á Hrafnistu í Hraunvangi í Hafnarfirði, sem lést 31. október og fjallað hefur verið um á samfélagssíðu aðstandanda á Facebook, vill Hrafnista taka eftirfarandi fram:
Vegna þagnarskyldu getum við ekki tekið þátt í opinberri umræðu um málefni einstakra íbúa okkar. Okkur þykir mjög miður að heyra af upplifun viðkomandi ættingja varðandi andlátið. Hins vegar er mjög mikilvægt að fram komi að sú upplifun er ekki lýsing á raunverulegri atburðarás. Andlát ber að með mismunandi hætti og ráða þar margir mismunandi þættir, m.a. líkamlegt ástand. Andlát nákomins ættingja geta einnig verið afar erfið aðstandendum. Hrafnista ber fulla virðingu fyrir tilfinningum aðstandenda og íbúa og reynir heilbrigðisstarfsfólk sitt allra besta til að umgangast alla af fyllstu nærgætni. Í því tilviki sem hér er gert að umtalsefni var verk- og gæðaferlum fylgt af vakthafandi heilbrigðisstarfólki Hrafnistu og gætt var samráðs við íbúa og aðstandendur í ferlinu. Samkvæmt verkferlum verður send tilkynning um málið til Embættis landlæknis.
Hrafnista harmar fréttaflutning af málinu og hvetur fjölmiðla til að sýna vönduð vinnubrögð og nærgætni í málum sem þessum.
