Fréttasafn

Guðríður Ósk Axelsdóttir, starfsmaður í aðhlynningu á Báruhrauni Hrafnistu Hraunvangi, hefur starfað á Hrafnistu í 35 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri:  Pétur Magnússon forstjóri Hrafnistu, Guðríður, Sólborg Tryggvadóttir aðstoðardeildarstjóri, Guðríður og Hrefna Ásmundsdóttir deildarstjóri á Báruhrauni.  

Hjörtur Júlíus Hjartarson hefur verið ráðinn til starfa sem mannauðsráðgjafi í mannauðsdeild Hrafnistuheimilanna.

Hjörtur er með meistarapróf í mannauðsstjórnun auk undirgráðu í stafrænni markaðssetningu frá EAE Business School í Barcelona. Í námi sínu lagði hann áherslu á jákvæða sálfræði, markþjálfun og kjaramál. Fyrir er Hjörtur með meistarapróf í blaða- og fréttamennsku.

Hjörtur vann lokaverkefni sitt í mannauðsstjórnun í samvinnu við Vodafone og fjallaði þar um innleiðingu sveigjanlegs vinnutíma hjá fyrirtækinu. Hann kannaði hvaða áhrif sveigjanlegur vinnutími hefur á líf fólks, hvort sem um ræðir í vinnu eða einkalífi. Hjörtur hefur víðtæka stjórnunarreynslu frá fyrri störfum sem deildarstjóri, vaktstjóri, ritsjóri og umsjónamaður ýmissa þátta í útvarpi og sjónvarpi.

Við bjóðum Hjört velkominn í mannauðsteymi Hrafnistuheimilanna.

Jenjira Malooleem, starfsmaður í ræstingu Hrafnistu Laugarási, hefur starfað á Hrafnistu í 20 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Á meðfylgjandi mynd eru frá vinstri:  Pétur Magnússon forstjóri Hrafnistu, Jenjira og Auður Björk Bragadóttir deildarstjóri ræstingar Hrafnistu Laugarási. 

Haustfagnaður Hrafnistu við Laugarás var haldinn í gær, fimmtudaginn 19. september, í þjóðlegu haustveðri sem enginn lét þó trufla sig við fagnaðinn. Veislustjóri kvöldsins var Katrín Halldóra Sigurðardóttir sem skemmti gestum og söng af sinni alkunnu snilld við undirleik Hjartar Ingva Jóhannssonar. Hátíðarræðuna hélt svo Þórdís Lóa Þórhallsdóttir formaður borgarráðs, hún fór á kostum bæði í ræðumennsku og tók jafnvel lagið og var gerður góður rómur að framlagi hennar. Veitingarnar voru heldur ekki af verri endanum, kótilettur með öllu tilheyrandi sem fylgt var eftir með ljúffengri súkkulaðimús og svo sannarlega hægt að hrósa kokkunum okkar sem og öllu starfsfólki sem að viðburðinum kom. Aðeins var tæknin að stríða okkur varðandi hljóðkerfið og barst hljóð ekki eins vel á deildar og fyrirhugað var. Botninn í fagnaðinn sló svo hinn eini sanni Bragi Fannar sem þandi nikkuna af gleði eins og honum einum er lagið. Við þökkum öllum sem tóku þátt og lögðu hönd á plóginn við Haustfagnaðinn og óskum þess að haustið megi verða ykkur gott og gjöfult.

Haustið er sannarlega komið hér í Boðaþingi, laufin fjúka í kringum húsin, kartöflurnar uppteknar og sumarlögin hafa verið lögð til hliðar.  Oft fylgir haustveðrinu svolítil lægð í húsinu og þá er gott að hafa eitthvað til að hlakka til. Haustfagnaður Hrafnistu í Boðaþingi var haldinn síðastliðinn miðvikudag.  Það var mikil tilhlökkun og spenna í húsinu, sparifötin pressuð og mikið umstang. Katrín Halldóra söng- og leikkona var veislustjóri og stóð sig frábærlega vel.  Ljúfu tónarnir hennar svifu um allt hús og einn íbúi okkar kom í gær og sagði „ég var bara með gæsahúð í hvert sinn sem hún söng, hún er dásamleg“.  Það má með sanni segja að hún eigi marga aðdáendur hér í Boðaþingi efitir kvöldið.  Það spillti ekki fyrir að píanóleikarinn Hjörtur Jóhannsson spilaði undir og  var samspil þeirra skemmtilegt.  Margir höfðu gaman af að heyra að Hjörtur væri sonur stórmeistarans okkar ástkæra í skák, Jóhanns Hjartarsonar.  Það hefur gefið af sér og spurning hvort við stofnum skák klúbb hér í framhaldinu.  Ræðumaður kvöldsins var Ólafur Þ. Gunnarsson alþingismaður og öldrunarlæknir en pistill hans var einlægur og vakti mann til umhugsunar.  Bragi Fannar harmonikkuleikari lokaði kvöldinu fyrir okkur og nýttu nokkrir sér tækifærið og tóku nokkur dansspor.  En það sem er kannski eftirminnilegast við haustfagnaðinn er hvað allir leggjast á eitt um að eiga góða stund saman, íbúar, gestir og starfsfólk.  Allir tilbúnir að leggja okkur lið í þeim efnum og viljum við hér með þakka öllum sem komu að þessari skemmtun.  Á það við um starfsfólk, íbúa og gesti.  Takk fyrir okkur.

Svava Valdimarsdóttir, íbúi á Hrafnistu Hraunvangi í Hafnarfirði, fagnar 90 ára afmæli sínu á næstu dögum. Af því tilefni buðu aðstandendur hennar upp á tónleika þar sem söngvarinn K.K. - Kristján Kristjánsson söng og spilaði á gítar fyrir Svövu og íbúa deildarinnar sem hún býr á, öllum til mikillar ánægju.

Föstudaginn 13. september sl. fór fram árlegt púttmót sveitar Hrafnistu í Hraunvangi og bæjarstjórnar Hafnarfjarðar á púttvellinum við Hrafnistu í Hafnarfirði, þar sem keppt er um farandbikarinn mikla. Keppnin var óvenju spennandi að þessu sinni. Rósa Guðbjartsdóttir bæjarstjóri sigraði í kvennaflokki en það dugði ekki til því Hrafnista vann farandbikarinn í samanlögðum árangri rétt eins og öll önnur ár sem keppnin hefur farið fram. Við þökkum bæjarstjórn Hafnarfjarðar fyrir drengilega keppni nú sem endranær og hlökkum til að mæta þeim aftur að ári.  

Hjördís Geirsdóttir söngkona heimsótti Hrafnistu Hraunvang sl. föstudag og söng með DAS – bandinu en vikulega eru þar haldin dansiböll á föstudögum eftir hádegið. Við þökkum henni kærlega fyrir skemmtunina.