Leit

social link

 

Föstudagsmolar 18. ágúst 2017 - Pétur Magnússon, forstjóri

FÖSTUDAGSMOLAR FORSTJÓRA

Föstudaginn 18. ágúst 2017.

 

Ágæta samstarfsfólk á Hrafnistuheimilunum,

Um myndatökur og þagnarskyldu gesta á Hrafnistu

Í sumar sendum við frá okkur sérstaka tilkynningu til aðstandenda um myndatökur og þagnarskyldu þeirra gesta sem heimsækja Hrafnistuheimilin og þar með íbúa okkar. Þetta var af gefnu tilefni þar sem gestur íbúa eins Hrafnistuheimilis tók upp myndbönd af öðrum íbúa (honum ótengdum) í óheppilegum aðstæðum og deildi á samfélagsmiðla. Þessar upptökur voru fjarlægðar samkvæmt beiðni okkar en ekki er hægt að ætlast til að starfsfólk Hrafnistu geti fylgst með öllu efni á samfélagsmiðlum. Því var farið í að senda tilkynninguna út. Í henni eru gestir Hrafnistuheimilanna minntir á “að það sem þú kannt að sjá eða heyra um aðra íbúa á Hrafnistuheimilunum heldur þú með sjálfum þér.” Ekki er leyfilegt að ræða slík mál utan Hrafnistu, taka ljósmyndir af íbúum Hrafnistu né upptöku án leyfis íbúa. Slíkt varðar við lög um persónuvernd og meðferð persónuupplýsinga nr. 77/2000. Þessi tilmæli hafa nú einnig verið hengd upp víða um Hrafnistuheimilin og hefur verið vel tekið.

Jafnframt er gott að minna alla á verklagsreglur Hrafnistu um aðkomu fréttamanna og ljósmyndara á Hrafnistu – slíkum beiðnum á undantekningalaust að vísa til forstjóra, forstöðumanns viðkomandi heimilis eða staðgengla. Eins ef starfsfólk verður vart við slíka aðila á vappi í húsunum þá ættu þeir alltaf að vera í fylgd með fulltrúum Hrafnistu.

Allt þetta er gert til að vernda einkalíf íbúanna okkar.

 

25 ára klúbbur Hrafnistu – boð fyrir meðlimi þann 22. september nk.

Það hefur verið lán Hrafnistu að hafa frábæran kjarna starfsfólks í vinnu á heimilunum. Mannauðurinn er eitt það dýrmætasta sem Hrafnista á og eru tryggð og starfsreynsla þættir sem við á Hrafnistu metum mjög mikils. Árið 2008 kallaði framkvæmdastjórn Hrafnistu saman alla starfsmenn heimilanna sem starfað höfðu á Hrafnistu í 25 ár eða lengur (og voru enn starfandi) og stofnaði fyrir þá sérstakan klúbb – 25 ára klúbbinn. Það þykir merkilegt í fyrirtækjum í dag ef einn starfsmaður nær svo háum starfsaldri en hjá okkur var þetta vaskur hópur, rúmlega 30 manns.

Árið 2011 var hópurinn kallaður aftur saman. Í framhaldinu birtist meðal annars mynd af hópnum og umfjöllun á baksíðu Morgunblaðsins. Haustið 2014 var hópurinn einnig kallaður saman og var þá hópurinn ennþá tæplega 30 manns.

Nú á afmælisárinu mikla, nánar tiltekið þann 22. september, munum við enn og aftur heiðra þessa tryggu einstaklinga. Frá árunum 2008, 2011 og 2014 hafa eðlilega margir hætt vegna aldurs en einhverjir nýjir hafa bæst í hópinn. Næstu vikurnar verður unnið að því að uppfæra listann og eru þeir jafnan taldir með sem hafa verið í starfi á þessu ári, þó þeir verði hættir störfum þann 22. september.

 

Starfsafmæli í júlí

Nú í júlí áttu nokkrir úr okkar glæsta starfsmannahópi formleg starfsafmæli hér á Hrafnistu. Þetta eru:

3 ára starfsafmæli:Í Reykjavík eru það Bergrós Elín Hilmarsdóttir og Guðný Sara Birgisdóttir á Lækjartorgi, Katarzyna Anna Stroz á Miklatorgi og Bella Debbie Jane Víðisdóttir og Vera Hjördís Matsdóttir, báða á Sól- og Mánateig. Í Hafnarfirði eru það Guðbjörg Pétursdóttir á Bylgjuhrauni, Þorbjörg E. Jónsdóttir á Ölduhrauni og Arndís Embla Jónsdóttir á Sjávar- og Ægishrauni.

5 ára starfsafmæli:Xuan Kim Phu Thai í Borðsal í Reykjavík og Karen Erna Ellertsdóttir á Ölduhrauni og Davíð Jacobsen á Bylgjuhrauni, bæði í Hafnarfirði.

10 ára starfsafmæli:Irina A. Prokhorova á Viðey í Reykjavík og Evelinda Dealca Gomez í Garðabæ.

Síðast en ekki síst er það svo Ásta María Traustadóttir í borðsalnum í Hafnarfirði sem hefur starfað í 30 ár fyrir Hrafnistu!

Hjartanlega til hamingju öll og kærar þakkir fyrir tryggðina við Hrafnistu!

 

Góða helgi og njótið Menningarnætur eða hvers þess sem þið gerið um helgina!

Bestu kveðjur,

Pétur

Til baka takki

Banners neðst á forsíðu 1

Happdrætti DAS