Fréttasafn

Menningarsalurinn okkar var þétt setinn sl. laugardag þegar Karlakórinn Þrestir kom í heimsókn á Hrafnistu í Hafnarfirði og söng falleg jólalög. Þegar sálmurinn Heims um ból var sunginn risu áheyrendur upp úr sætum og sungu með.

Inga Pálsdóttir sá um að kynna Þrestina fyrir hönd Hrafnistu og þakka þeim fyrir komuna. Hún tekur virkan þátt í öllu því sem fer fram á heimilinu okkar og er alltaf fyrst til að rétta fram hjálparhönd þrátt fyrir að vera komin á níræðisaldur.

Þrestirnir sögðust alsælir með móttökurnar og þökkuðu kærlega fyrir hressinguna sem þeim var boðið upp á eftir sönginn.

Við þökkum þeim innilega sem og öllum þeim sem hafa gefið okkur tíma sinn til að veita okkur gleði og góðar stundir í aðdraganda jólahátíðinnar og yfir árið í heild.

Hátíðarguðsþjónusta verður haldin í salnum á móti sjúkraþjálfuninni á annarri hæð, Hrafnistu Kópavogi, 27. desember  kl. 14:00.

Organisti: Matthías Búi

Prestur: Sr. Sveinn Alfreðsson

Jólamessa verður haldin á jóladag kl. 15:00 á Nesvöllum og kl. 15:30 á Hlévangi

Organisti: Arnór Vilbergsson

Kór: Meðlimir úr kór Keflavíkurkirkju

Prestur: Sr. Eva Björk Valdimarsdóttir

Hátíðarguðsþjónusta verður haldin í Menningarsalnum 1. hæð, Hrafnistu Hafnarfirði,  á aðfangadag jóla kl. 14:00.

Organisti: Kristín Waage

Hátíðarkvartett syngur

Forsöngvari: Jóhanna Ósk Valsdóttir

Prestur: Sr. Svanhildur Blöndal

Hátíðarguðsþjónusta verður haldin í samkomusalnum Helgafelli, Hrafnistu Reykjavík, á aðfangadag jóla kl. 16:00.

Organisti: Magnús Ragnarsson

Félagar úr Kammerkór Áskirkju syngja

Forsöngvari: Magnús Ragnarsson

Einsöngur: Rakel Edda Guðmundsdóttir

Prestur: Sr. Svanhildur Blöndal

Undanfarin ár hefur Pétur Magnússon, forstjóri Hrafnistuheimilanna, farið í jólaheimsókn fyrir jólin á allar deildar Hrafnistuheimilanna ásamt fríðu föruneyti sem hefur sungið og spilað jólalög fyrir heimilisfólk, starfsfólk og gesti.

Á meðfylgjandi mynd má sjá föngulegan hóp sem heimsótti allar deildar á Hrafnistuheimilunum í Reykjavík og Reykjanesbæ í gær og í dag ætlar hópurinn að heimsækja heimilin í Hafnarfirði og Kópavogi, syngja, spila og dreifa jólanammi.

Þessum jólaheimsóknum fylgir sannkallaður jólaandi sem allir hafa ánægju og gleði af.

Undanfarna daga hefur heimilisfólk á Hrafnistu í Hafnarfirði rifjað upp gamla takta í eldhúsinu í aðdraganda jólanna, bakað m.a. piparkökur, drukkið heitt kakó með rjóma og hlustað á jólatónlist.

Mikið hefur verið spjallað og hlegið og m.a. uppgötvast að orðið fullorðinn hefur fleiri en eina merkingu. Mögulega hafði sherry glöggin áhrif þar á …. FULL - ORÐINN :-)

Í jólabingóinu, sem fram fór í gær, var gríðarlega góð þátttaka og salurinn gjörsamlega troðfullur. Fólk sat með bingóspjöldin sín á göngugrindunum og nýttu allt pláss sem hægt var að nýta. Meira að segja var bekkurinn við orgelið nýttur sem borð enda ekki skrýtið þar sem vinningar voru mjög veglegir. Þökk sé frábærum fyrirtækjum sem lögðu okkur lið, bæði á höfuðborgarsvæðinu og af landinu, en þeir komu m.a. alla leið frá Vestmannaeyjum.

Skólahljómsveit Víðistaðaskóla hélt tónleika í Menningarsalnum í gær og Sylvía Melsted söngkona steig á stokk ásamt Reyni undirleikara sínum og söng nokkur lög fyrir heimilisfólk og gesti.