Fréttasafn

Jólin eru svo sannarlega komin á heimilið okkar í Hafnarfirðinum.
Dagurinn í gær byrjaði á því að jólamarkaðurinn var opnaður. Hópur af börnum frá leikskólanum Álfabergi kom og skreytti jólatréð með heimilisfólkinu okkar á Bylgjuhrauni 2. hæð. Eftir hádegi komu börn af leikskólanum Víðivöllum og sungu á tónleikum fyrir okkur og að lokum var ljúf jólastund hjá fólkinu á Sjávar- og Ægishrauni. 

„Við stelpurnar á Sjávar- og Ægishrauni ákváðum fyrir nokkru síðan að bjóða heimilisfólkinu okkar í jólakaffi núna í desember. Dagurinn í dag einkenndist af mikilli gleði og hamingju. Veisluborðið ætlaði að svigna undan kræsingum! Tertur, heitir réttir, rúllutertubrauð, franskar kökur, heimabakaðir hálfmánar og vanilluhringir voru meðal annars sem hægt var að gæða sér á. Í alvöru veislum er stundum boðið upp á söngatriði og við vorum svo heppin að mæðgurnar Helga og Bríet Klara ( 5 ára) komu og sungu fyrir okkur nokkur jólalög. Þegar við höfðum sungið öll saman jólasálminn Heims um ból þá réttum við heimilisfólkinu okkar lítinn jólaglaðning. Bros og gleði voru á hverju andliti og þar með höfðum við starfsfólkið náð fram okkar markmiði“.

Hið árlega jólaþorp Hrafnistu í Reykjavík verður opið á Helgafelli 4.hæð fimmtudaginn 3. desember og föstudaginn 4. desember. Opnunartími er frá kl. 10:00 - 15:30.

Fjölbreytt handverk og ýmsar vörur heimilismanna og starfsmanna til sölu á góðu verði.

Tilvalið að versla jólagjafirnar í ár í jólaþorpinu.
Heitt á könnunni og allir velkomnir!

Pétur Eggerz frá Möguleikhúsinu fór á kostum þegar hann kom í heimsókn á Hrafnistu í Reykjavík með leikritið Aðventa, þann 1. desember sl.

Aðventa, eftir Gunnar Gunnarsson í leikgerð og leikstjórn Öldu Arnardóttur, er án efa vinsælasta saga Gunnars Gunnarssonar og er enn gefin út í stórum upplögum víða um lönd.

Vinnumaðurinn Benedikt fer til fjalla í vetraríki aðventunnar að leita þess fjár sem eftir varð er smalað var um haustið. Það er köllun hans að koma þessum villuráfandi sauðum í öruggt skjól fyrir hátíðirnar. Klassísk saga um náungakærleika og fórnfýsi.

Í vikunni komu rithöfundarnir Einar Már Guðmundsson og Iðunn Steinsdóttir og lásu upp úr bókum sínum fyrir heimilisfólk á Hrafnistu í Reykjavík.

Einar Már Guðmundsson las upp úr bók sinni Hundadagar og Iðunn Steinsdóttir las upp úr bók sinni Hrólfur sem kom út nýverið.

Það er alltaf nóg um að vera í jólamánuðinum á Hrafnistu og má þar m.a. nefna jólakortagerð, piparkökubakstur, jólakaffiklúbbur, jólaglögg og jólaslökun.

Einnig má nefna ýmsar uppákomur eins og t.d. kynningu og upplestur úr bókum, söngur og tónlist ýmiskonar.

Jóladagskrá Hrafnistu í Reykjavík má skoða með því að smella hér

Margrét Brynjólfsdóttir, sjúkraliði á Báruhrauni Hrafnistu í Hafnarfirði, hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Handverskssalan sem vera átti í dag, þriðjudaginn 1. desember, færist yfir á morgundaginn vegna veðurs. 

Sjá viðhengi.

Anna Sigríður Þorleifsdóttir hjúkrunarfræðingur á Lækjartorgi/Viðey/Engey hefur verið ráðin aðstoðardeildarstjóri á  sameinaða deild Sólteigs og Mánateigs á Hrafnistu í Reykjavík.

Hún hefur störf þann 4. janúar 2016. Anna Sigríður útskrifaðist sem hjúkrunarfræðingur frá University college Lillebælt 2011.  Við óskum henni velfarnaðar í nýju starfi á Sólteig/Mánateig.