Fréttasafn

Hin árlega sumargleði íbúa á Hrafnistu Nesvöllum var haldin í hádeginu í gær. Boðið var upp á grillaðan kjúkling og lambakjöt með öllu tilheyrandi ásamt ís í eftirrétt. Bræðurnir Hjörleifur og Eiður í bandinu Heiður komu í heimsókn og héldu uppi miklu fjöri.

Meðfylgjandi myndir voru teknar á Hrafnistu Nesvöllum í gær þar sem íbúar og starfsfólk gerðu sér glaðan dag.

Í ljósi breytinga á framgangi heimsfaraldursins, Covid-19, eru heimsóknargestir á Hrafnistu minntir á mikilvægi þess að gæta vel að persónubundnum sóttvörnum s.s. handþvotti og handsprittun. Einnig eru heimsóknargestir minntir á að koma alls ekki í heimsókn ef þeir eru með einhver önnur almenn einkenni um veikindi. 

Neyðarstjórn Hrafnistu hefur ákveðið að gera ekki stórvægilegar breytingar á reglum um heimsóknir að svo stöddu en leggur áherslu á að heimsóknargestir séu eingöngu í heimsókn á herbergjum íbúa, en ekki í setustofum eða borðstofum eininga/deilda eða í öðrum alrýmum heimilanna. 

Bréf sem neyðarstjórnin sendi út til íbúa og aðstandenda má lesa HÉR

Neyðarstjórn Hrafnistu leggur áherslu á að nauðsynlegt er að fylgja tilmælum sóttvarnaryfirvalda og grípa til frekari aðgerða og takmarkana  ef þörf krefur.

Þriðjudaginn 15. júní sl. fagnaði Hrafnista Hraunvangi 44 ára afmæli en heimilið hóf formlega starfsemi sína í Hafnarfirði á sjómannadaginn þann 5. júní árið 1977.

Skipulögð dagskrá fór fram í Menningarsalnum þar sem meðal annars var haldin poppmessa með sr. Jóni Helga presti í Hafnarfjarðarkirkju og góðvinum okkar í Silfursveiflunni. Að dagskrá lokinni var öllum boðið í hátíðarkaffi.

Karen Dröfn Gísladóttir hefur verið ráðin aðstoðardeildarstjóri hjúkrunar á Hrafnistu Boðaþingi í afleysingu fyrir Önnu Björk Sigurjónsdóttur sem er farin í fæðingarorlof.

Karen Dröfn lauk B.Sc. prófi í hjúkrunarfræði frá Háskóla Íslands árið 2021. Hún hefur starfað sem hjúkrunarnemi í Boðaþingi frá því í apríl 2020.

Jana Kristín Alexandersdóttir hefur verið ráðin aðstoðardeildarstjóri hjúkrunar á 1. og 3. hæð Hrafnistu Skógarbæ frá 1. júlí 2021. Jana lauk B.Sc. prófi í hjúkrunarfræði frá Háskólanum á Akureyri árið 2018. Hún hefur starfað sem hjúkrunarfræðingur í Skógarbæ frá því í nóvember árið 2020. Jana starfaði áður á Landspítalanum m.a. á Kvenlækningadeild.

Samkvæmt sóttvarnaryfirvöldum er staðan á Íslandi varðandi heimsfaraldur Covid-19 nú góð og verulegar tilslakanir hafa verið boðaðar á samkomutakmörkunum frá og með 15. júní. Þetta eru gleðifréttir og hefur Neyðarstjórn Hrafnistu ákveðið að aflétta verulega þeim heimsóknartakmörkunum sem hafa verið undanfarin misseri á heimilunum.

Frá og með 15. júní verða heimilin opnuð að nýju eins og fyrir tíma kórónuveirunnar. Engar takmarkanir eru á fjölda heimsóknargesta og aðstandendur hafa heimild til að vera í samrýmum deilda með íbúum og starfsfólki. Áfram verður þó ávallt að sýna ýtrustu varkárni í heimsóknum og mikilvægt er að hafa áfram í huga persónulegar sýkingavarnir s.s. handþvott og handsprittun til forðast að smit berist á milli einstaklinga.

Neyðarstjórn Hrafnistu tilkynnti íbúum að aðstandendum þessar breytingar í dag:

Tilslökun á heimsóknartakmörkunum á Hrafnistuheimilunum frá og með þriðjudeginum 15. júní 2021

Í síðustu viku voru sumarblómin sett niður á Hrafnistu í Boðaþingi með aðstoð íbúa, grasið slegið og beðin hreinsuð. Í vikunni hófst síðan afmælisvika Boðaþings en í mars árið 2020 varð Hrafnista í Boðaþingi 10 ára og þá buðu aðstæður í samfélaginu ekki upp á veisluhöld. Nú rúmu ári síðar er svo sannarlega kominn tími til að fagna þessum fyrsta áratug Hrafnistu í Boðaþingi. Það verður nóg um að vera næstu daga til að halda upp á þau tímamót.

Boðaþingshátíðin hófst formlega á miðvikudaginn þegar Guðrún Árný söngkona reið á vaðið og hugljúfir og dásamlegir tónar fylltu húsið. Dagurinn í gær var svo fullur af lífi og fjöri þegar opnuð var sýning á afrakstri Listaklúbbs Boðaþings en þar má sjá verk eftir íbúa og gesti dagdvalar í Boðaþingi. Að sjálfsögðu var skálað í freyðivíni fyrir listamönnum og gestum. Þá var haldið Kráarkvöld að hætti Breta eftir kaffið og þar var svo sannarlega líf og fjör.

Hefðbundin dagskrá Sjómannadagsráðs höfuðborgarsvæðisins var haldin með takmörkunum á sjómannadaginn, þann 6. júní sl. Hátíð hafsins við gömlu höfnina var ekki haldin í ár vegna gildandi samkomutakmarkana en að venju ríkti mikil hátíðarstemning á Hrafnistuheimilunum á sjómannadaginn þar sem skreytingar og flöggun eru hafðar í hávegum og íbúum og aðstandendum boðið í hátíðarkaffi.

Látinna og týndra minnst
Dagskráin hófst að morgni sjómannadagsins með minningarathöfn um drukknaða og týnda sjómenn við Minningaröldur Sjómannadagsráðs við Fossvogskirkju þar sem þeirra var minnst. Við athöfnina stóðu aðilar frá Landhelgishæslunni heiðursvörð og blómsveigur var lagður að minnismerkinu um óþekkta sjómanninn.

Sjómannamessa í Dómkirkjunni
Að lokinni minningarathöfn í Fossvogi hófst hin árlega sjómannamessa  í Dómkirkjunni þar sem biskup Íslands, Agnes M. Sigurðardóttir, predikaði. Séra Sveinn Valgeirsson þjónaði fyrir altari og starfsfólk Landhelgisgæslunnar las úr ritningunni. Dómkórinn söng undir stjórn Kára Þormar organista. Einsöng annaðist Magnús Már Björnsson. Hátíðarmessunni var að venju útvarpað á Rás 1 Ríkisútvarpsins.

Heiðrun sjómanna

Að lokinni guðsþjónustu voru sjómenn heiðraðir eins og venja er en vegna fjöldatakmarkana var heiðrunarathöfn Sjómannadagsráðs höfuðborgarsvæðisins með óhefðbundnu sniði í ár. Sökum heimsfaraldursins féll Hátíð hafsins niður en Sjómannadagsráð lét ekki deigan síga og hélt látlausa athöfn í þjónustumiðstöðinni Sléttunni á Sléttuvegi fyrir sjómenn þá er skarað hafa fram úr og skilað af sér farsælu starfi til sjós. Þeir sem voru heiðraðir eru Guðlaugur Jónsson, Árni Sigurbjörnsson, Benedikt Svavarsson, Jón Bjarnason og Ólafur Theódór Skúlason. Hefð er fyrir því að karlakór flytji viðeigandi sönglög af þessu tilefni en ákveðið var að sníða stakk eftir vexti og fá Gissur Pál Gissurarson til að þenja raddböndin fyrir viðstadda. Á daginn kom að ekkert píanó var til staðar á Sléttunni og því yrði enginn undirleikurinn. Fulltrúar Sjómannadagsráðs settu sig því í samband við stórútgerðarmanninn Guðmund Kristjánsson í Brimi og sögðu honum frá málavöxtum. Guðmundur er vanur því að láta hendur standa fram úr ermum og var fljótur til að glæða þjónustumiðstöðina tónum og lífi með því að kaupa stórgóða slaghörpu af gerðinni Kawai. Hljóðfærið var svo vígt af Bjarna Frímanni Bjarnasyni, hljómsveitastjóra og píanóleikara, sem annaðist undirleik í athöfninni. Þessi höfðinglega gjöf mun nýtast gestum þjónustumiðstöðvarinnar á Sléttunni og íbúum á Hrafnistu Sléttuvegi við hin ýmsu tilefni um ókomna tíð. Sjómannadagsráð þakkar Guðmundi Kristjánssyni í Brimi innilega fyrir þessa rausnarlegu gjöf. Viðburðurinn var mjög hátíðlegur og tókst mjög vel til en honum var streymt á heimasíðu Sjómannadagsráðs og á Facebooksíðu Sjómannadagsráðs.

Meðfylgjandi myndir voru teknar við athöfnina en eftir heiðrun sjómanna var boðsgestum boðið að þiggja veitingar. Þennan dag hélt KK tónleika fyrir gesti og gangandi á Sléttunni.

Íslands Hrafnistumenn
Síðasta dagskrárlið Sjómannadagsráðs á sjómannadaginn í ár annaðist Ríkisútvarpið á Rás 1 með dagsrárliðnum Íslands Hrafnistumenn. Í þættinum ræddi Margrét Blöndal við Hálfdan Henrysson, formann ráðsins og Guðmund Hallvarðsson, fyrrverandi formann um sögu Sjómannadagsráðs.