Fréttasafn

Árlegt árvekniátak bleiku slaufunnar er í fullum gangi og þann 15. október var hinn árlegi bleiki dagur. Á bleika deginum eru landsmenn hvattir til að bera slaufuna, klæðast bleiku og lýsa skammdegið upp í bleikum ljóma svo allar konur sem greinst hafa með krabbamein finni stuðning okkar og samstöðu.

Íbúar og starfsfólk Hrafnistuheimilanna hafa ekki látið sitt eftir liggja í vitundarvakningunni gegnum árin og lagt metnað sinn í að vera sem bleikastir á bleika daginn. Heimili Hrafnistu eru að sama skapi skreytt með bleiku og starfsfólk deilda er hvatt til þess að hafa umhverfi sitt sem bleikast.

Meðfylgjandi myndir eru frá lífinu á Hrafnistuheimilunum á bleika deginum sl. föstudag.

Hinn árlegi haustfagnaður var haldinn á Hrafnistu Nesvöllum í gær. Venju samkvæmt var boðið var upp á kótilettur í raspi með öllu tilheyrandi og ís í eftirrétt. Bandið Heiður spilaði og söng fyrir íbúa og starfsfólk og hélt uppi góðri stemningu og  margir tóku undir í söngnum.

Meðfylgjandi myndir voru teknar á Hrafnistu Nesvöllum í gær.

Öldrunarráð Íslands auglýsir eftir umsóknum um styrk í Rannsóknarsjóð Öldrunarráðs. Umsóknarfrestur er til og með 19. október 2021. Úthlutað verður á aðalfundi Öldrunarráðs Íslands þann 9. nóvember næstkomandi.

Einnig óskar Öldrunarráð eftir tilnefningum til viðurkenningar Öldrunarráðs Íslands. Öllum er heimilt að senda inn tilnefningar. Frestur til að senda inn tilnefningar er til og með 19. október 2021.

Viðurkenningar

Árlega veitir Öldrunarráð Íslands sérstaka viðurkenningu til einstaklings, stofnunar eða félagasamtaka sem þykja hafa unnið einstakt starf tengt málefnum aldraðra. Öllum er frjálst að senda inn tilnefningar og er auglýst eftir tilnefningum í fjölmiðlum. Viðurkenningin er svo veitt á aðalfundi Öldrunarráðs, sem haldinn er í maí.

Nánar má lesa um viðurkenningar Öldrunarráðs með því að smella HÉR

Frekari upplýsingar varðandi umsóknarferlið má lesa með því að smella á myndirnar hér fyrir neðan:

Árlegur haustfagnaður Hrafnistu Hraunvangi í Hafnarfirði var haldinn hátíðlegur í hádeginu fimmtudaginn 7. október sl. Um veislustjórn sáu þeir Björgvin Franz og Þorgeir Ástvaldsson.

Aríel Pétursson, nýkjörinn formaður Sjómannadagsráðs, flutti erindi og Dansbandið sá um að halda uppi fjöri á ballinu sem fram fór eftir borðahaldið.

Mikil gleði var við völd enda langþráður draumur orðinn að veruleika að mega loksins koma saman og skemmta sér. Meðfylgjandi myndir voru teknar á haustfagnaðinum og eins og sjá má á myndunum skemmtu allir sér vel.

Þessa dagana fer hinn árlegi haustfagnaður fram á Hrafnistuheimilunum þar sem boðið er upp á kótilettur í raspi með öllu tilheyrandi og ís í eftirrétt. Í gær var haustfagnaður haldinn hátíðlegur í hádeginu á Hrafnistu Hlévangi í Reykjanesbæ, Hrafnistu Skógarbæ, Boðaþingi, á Ísafold, Sléttuvegi og í Hraunvangi.

Meðfylgjandi myndir eru frá haustfagnaði sem haldinn var á Hrafnistu Hlévangi og í Skógarbæ.

Á Hlévangi hélt Hjörleifur Már úr bandinu Heiður uppi góðri stemningu og spilaði og söng fyrir íbúa og margir tóku undir í söng.

Á Hrafnistu í Skógarbæ spilaði Guðrún Árný og söng fyrir íbúa á meðan skálað var í sherry og baileys.

Saliha Lirache, starfsmaður í eldhúsi á Hrafnistu í Laugarási,  hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Saliha Lirache fékk afhenta starfsafmælisgjöf frá Hrafnistu að þessu tilefni og var meðfylgjandi mynd tekin við það tækifæri.

Á myndinni eru frá vinstri: Ólafur Haukur Magnússon yfirmaður eldhússins, Særún Embla Kristmannsdóttir, Saliha Lirache og Oddgeir Reynisson framkvæmdastjóri rekstrarsviðs Hrafnistu.

Særún Embla átti 3 ára starfsafmæli og fékk einnig afhenta starfsafmælisgjöf samkvæmt venju hér á Hrafnistu.

Ólöf Erna Arnardóttir, sjúkraliði á Ölduhrauni Hrafnistu Hraunvangi,  hefur starfað á Hrafnistu í 25 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

Ólöf Erna fékk afhenta starfsafmælisgjöf frá Hrafnistu að þessu tilefni og var meðfylgjandi mynd tekin við það tækifæri.

Á meðfylgjandi mynd eru frá vinstri: Árdís Hulda Eiríksdóttir forstöðumaður Hrafnistu Hraunvangi, Hrönn Önundardóttir hjúkrunardeildarstjóri á Ölduhrauni, Ólöf Erna, Hrefna Ásmundsdóttir hjúkrunardeildarstjóri á Báruhrauni og María Fjóla Harðardóttir forstjóri Hrafnistu.

Í gær, miðvikudaginn 22. september, birtist í Fréttablaðinu grein eftir þau Sigurð Garðarsson framkvæmdastjóra Sjómannadagsráðs höfuðborgarsvæðisins og Maríu Fjólu Harðardóttur forstjóra Hrafnistuheimilanna. Greinin ber yfirskriftina Frelsi til að velja og má lesa hér fyrir neðan.

Frelsi til að velja

Það er mikið fagnaðarefni að heilbrigðismálin skuli fá það vægi sem raun ber vitni í aðdraganda kosninga. Og það er líka fagnaðarefni að á því sviði skuli málefni öldrunarþjónustu fá sinn verðuga sess. Og ekki síst ber að fagna því að engum virðist lengur dyljast að blása þarf til stórsóknar á öllum vígstöðvum til þess að mæta þeim miklu áskorunum sem bíða okkar vegna lengri lífaldurs og um leið lengra ævikvölds. Það er bæði brýnt og ögrandi verkefni og þar mun vonandi sannast sem svo oft áður að margar hendur vinna létt verk.

Hjúkrunarheimilin og önnur öldrunarþjónusta sem Sjómannadagsráð og Hrafnistuheimilin reka vilja í þessum efnum leggja öflugt lóð á vogarskálarnar. Tilgangur allrar okkar starfsemi snerist strax í árdögum hennar um velferð og öryggisnet sjómanna og síðar almennings þegar hallaði að kveldi í lífi þeirra. Þar erum við enn í dag með rekstur hjúkrunarheimila okkar auk annarra búsetuúrræða og fjölbreyttrar þjónustu.

Nýafstaðið heilbrigðisþing dró upp skýra mynd af nýjum tímum, nýrri tækni, nýjum möguleikum og nýjum viðfangsefnum í þjónustu við aldraða. Sannindin voru e.t.v. ekki ný en þeim var safnað saman af vandvirkni og urðu um leið að enn einu þjóðarverkefninu sem enga bið þolir að ráðist verði í. Í því verki viljum við sem fyrr leggja allt sem við getum af mörkum.

Verðmætasta framlag okkar er vitaskuld sú reynsla og þekking sem safnast hefur upp í þá tæpu öld sem við höfum starfað. Þá erum við ekki að meina uppbyggingu og rekstur fasteigna, sem við þó sannarlega þekkjum, né heldur faglega þekkingu á þjónustu við aldraða og veika sem við höfum líka. Við eigum nefnilega í þriðja lagi falinn fjársjóð sem brennur í skinninu af löngun til þess að gera enn meira og enn betur: Starfsfólkið okkar. Það er reiðubúið til að takast á við fleiri viðfangsefni.

Enda þótt það kunni að þykja skrýtið í hraða og lífsgæðakapphlaupi nútímasamfélagsins þá er nefnilega sem betur fer til fólk sem á sér köllun í lífinu og fylgir henni. Ein slík er t.d. að vinna með börnum. Önnur að styðja við, hjúkra og líkna öldruðum á ævikvöldi þeirra. Þessu fólki fáum við seint fullþakkað – en vonandi fullborgað einn góðan veðurdag vegna þess að þetta eru störf sem í sjálfum sér beinlínis krefjast þess að vera metin að verðleikum. Engum getur dulist að við eigum þessu fólki skuld að gjalda.

Hjúkrunarheimili Hrafnistu eru með um 1.700 starfsmenn sem gefa sig af lífi og sál í verkefni sín á hverjum degi. Þeir hinir sömu hafa hlaupið hraðar síðustu ár til þess að halda uppi öryggi í þjónustu og þeir hafa líka komið út úr endalausum erfiðleikum og mótvindi Covid-faraldursins sem glæstir sigurvegarar. Við erum óendanlega stolt af þessu fólki og vitum bæði af þakklæti og aðdáun heimilismanna okkar og aðstandenda þeirra.

Einn af mörgum hornsteinum velferðarsamfélags okkar er frelsið til þess að leita sér menntunar og velja sér ævistarf við hæfi. Nákvæmlega hið sama á að gilda um ævikvöldið okkar. Enginn ágreiningur er um að fjölga þurfi heilsu- og búsetutengdum úrræðum fyrir aldraða og að kappkosta þurfi með öllum tiltækum ráðum að varðveita andlega heilsu þeirra og líkamlega ásamt því að tryggja þeim efnahagslegt heilbrigði. Þetta þrennt eru grunnþarfirnar – ofan á þær getum við svo töfrað fram fjölbreyttar lausnir nánast eins og á hlaðborði.

Og þá erum við komin að kjarna málsins. Hrafnista og Naustavör, dótturfélög Sjómannadagsráðs, vilja með öllum tiltækum ráðum koma að og styðja við aukna fjölbreytni í heilsu- og búsetuvalkostum aldraðra á ævikvöldi sínu. Við höfum í þeim efnum rutt ýmsum nýjungum braut í meira en fjóra áratugi og fjölgað búsetuúrræðum eldra fólks. Við viljum einfaldlega að hver og einn hafi frelsi til að velja það sem best hentar honum. Þann rétt má ekki taka af nokkrum manni og síst af öllu þeim sem komnir eru á efri ár.

Auðvitað verða hjúkrunarheimilin, í sinni stöðugu þróun, áfram til staðar og standa öldruðum opin sem örugg höfn. Það er ekki sjálfgefið að aldraðir eigi sér þann eina draum heitastan að dveljast sem lengst í eigin húsnæði og því þurfa að vera til aðrir valmöguleikar. Margir nýta sér nú þegar fjölbreyttari húsnæðiskosti á borð við þá sem Sjómannadagsráð býður, s.s. eignar eða leiguíbúðir í nágrenni þjónustukjarna hjúkrunarheimilanna, sérstakar stúdíóíbúðir, rúmgóð rými innan hjúkrunarheimilanna o.s.frv.

Á sama hátt þarf að virða og verja frelsi hvers og eins til þess að ákveða hversu mjög hann vill sinna færniþjálfun sinni, hreyfigetu o.s.frv. og sömuleiðis hvort félagslegir þættir á borð við að umgangast jafnaldra sína og jafningja, taka með þeim í spil og njóta samveru og samskipta við fólk í svipuðum aðstæðum skipti máli. Þar eigum við að hvetja alla til dáða en virða um leið ákvörðunarrétt þeirra gagnvart sínu eigin lífsmynstri. Sumir vilja e.t.v. aðallega fá að hvíla sig. Og stundum getur það líka verið bara fínt