FÖSTUDAGSMOLAR FORSTJÓRA
Föstudaginn 17. janúar 2020.
Ágæta samstarfsfólk á Hrafnistuheimilunum,
2020 er ár hjúkrunarfræðinga og ljósmæðra
Eins og mörgum er kunnugt hefur Alþjóðaheilbrigðismálastofnunin tileinkað hjúkrunarfræðingum og ljósmæðrum árið 2020. Það er sjálfsagt að byrja mola dagsins á því að koma á framfæri hamingjuóskum af því tilefni enda hjúkrunarfræðingar fjölmennir og mikilvægir í starfsemi Hrafnistu. Það er líka skemmtilegt að þetta ár fylgi í kjölfarið á árinu 2019 þar sem haldið var upp á 100 ára afmæli hjúkrunar á Íslandi. Vegna alþjóða ársins er Félag íslenskra hjúkrunarfræðinga með vitundarvakningarátak um hjúkrunarfræðina og störf þeirra. Gaman er að segja frá því að einn hjúkrunarfræðinganna í auglýsingum þessu tengdu er Hjördís Ósk Hjartardóttir, deildarstjóri á Sjávar- og Ægishrauni í Hraunvangnum. Ég rakst einmitt á risastóra mynd af henni í strætóskýli borgarinnar þar sem eftirfarandi tilvitnun var undir myndinni: „Það er hlutverk hjúkrunarfræðinga að sinna skjólstæðingum okkar frá vöggu til grafar.“ Hrafnista mun taka þátt í árinu og verður sú aðkoma kynnt betur síðar.
Gaman að þessu öllu – enn og aftur til hamingju kæru hjúkrunarfræðingar!
Fjögur biðrými á Hrafnistu Hraunvangi fyrir Hrafnistu Sléttuvegi
Heilbrigðisráðuneyti hefur veitt Hrafnistu Hraunvangi í Hafnarfirði, leyfi til rekstur fjögurra hjúkrunarbiðrýma frá og með deginum í dag og fram að opnun hjúkrunarheimilisins að Sléttuvegi. Biðrýmin eru eingöngu ætluð einstaklingum af Landspítala sem hafa færni- og heilsumat og eru á biðlista eftir varanlegu hjúkrunarrými á Sléttuvegi. Biðrýmin koma í stað dvalarrýma sem verið hafa í húsinu. Þessa dagana er verið að finna fólk í rýmin og flytur fólk inn í rýmin í dag og næstu daga.
Þorrablót á Hrafnistu
Á föstudaginn eftir viku er bóndadagur, fyrsti dagur hins forna mánaðar, þorra. Þessi árstími er jafnan mjög skemmtilegur hér á Hrafnistu enda blótum við þorrann af miklum móð á öllum vígstöðvum. Fjörið hjá íbúunum okkar hefst strax í hádeginu á Bóndadag þegar Ísafold og Hlévangur ríða á vaðið með hádegisþorrablótum þar sem harmonikkuleikur, söngur og fleira verður til gamans ásamt matardásemdunum. Laugarás er svo um kvöldið með sitt blót og svo fylgja hin heimilin í kjölfarið. Ég ætla reyna að vera duglegur að kíkja við á blótunum, þó ég komist ekki á þau öll. Hvert þorrablót og dagskrá þeirra er auglýst á hverju heimili.
Ég hlakka til að sjá ykkur sem flest:
Föstudagur 24. janúar í hádeginu – Ísafold og Hlévangur
Föstudagur 24. janúar kl 17:30 – Laugarás
Föstudagur 31. janúar í hádeginu – Nesvellir og Skógarbær
Fimmtudagur 6. febrúar kl 17:30 – Hraunvangur
Föstudagur 7. febrúar í hádeginu – Boðaþingi
Góða helgi!
Bestu kveðjur,
Pétur