Endurbættur, glæsilegur og bjartur tækjasalur á Hrafnistu í Laugarási var formlega vígður í gær. Gígja Þórðardóttir, deildarstjóri endurhæfingardeildar, flutti erindi þar sem hún fór yfir starfsemi deildarinnar og þær breytingar og endurbætur sem ráðist hefur verið í. Hún lagði áherslu á mikilvægi hvetjandi starfsfólks og góðs aðbúnaðar í endurhæfingu og þá jákvæðu þróun sem ný aðstaða mun hafa á starfsemina. Nýju tækin eru finnsk HUR tæki frá Fastus. Þau bjóða upp á marga möguleika til að bæta einstaklingsmiðaða þjónustu, fylgjast með framförum og geta tekið út tölulegar staðreyndir um notkun og árangur. Þau eru hljóðlát, notendavæn og hafa reynst mjög vel víða á Íslandi.
Við athöfnina var jafnframt opinberað nýtt nafn á tækjasalnum. Efnt hafði verið til nafnasamkeppni og bárust um 100 tillögur frá bæði íbúum og starfsfólki en salurinn hlaut nafnið Slippurinn.
Séra Daníel Ágúst Gautason, sem jafnframt er starfsmaður á endurhæfingardeildinni, vígði salinn og blessaði starfsemina með hlýjum orðum og góðum óskum um farsæla starfsemi til framtíðar.
Að lokinni vígslu var klippt á borða. Aðstoðardeildarstjórar endurhæfingardeildar, þær Jóhanna Björk Viktorsdóttir og Ásdís Ármannsdóttir héldu í borðann á meðan Gígja Þórðardóttir deildarstjóri, Emilía Brynja Sveinsdóttir, sem starfað hefur á endurhæfingardeildinni til fjölda ára, og Sigrún Stefánsdóttir forstöðumaður Hrafnistu í Laugarási klipptu á borðann.
Aríel Pétursson, formaður Sjómannadagsráðs, flutti einnig erindi við athöfnina. Hann ræddi meðal annars mikilvægi þeirrar þjónustu sem veitt er á Hrafnistu og þann mikla ávinning sem felst í öflugri endurhæfingu eldri borgara.
Opnunin markar mikilvægt skref í áframhaldandi þróun og eflingu þjónustu á Hrafnistu í Laugarási. Með endurbættum aðbúnaði og tækjum skapast enn betri aðstæður fyrir endurhæfingu þeirra sem nýta sér þjónustu deildarinnar.
