Hrafnista er eitt þriggja hjúkrunarheimila sem tók þátt í tilraunaverkefninu Málbrú sem er þróunarverkefni á vegum Samtaka fyrirtækja í velferðarþjónustu (SFV) og unnið í samstarfi við barna- og menntamálaráðuneytið.
Um 20% íbúa á Íslandi eru með annað móðurmál en íslensku og hækkar hlutfallið upp í 35% þegar litið er til starfsfólks á hjúkrunarheimilum. Á vinnustöðum þar sem samskipti skipta sköpum fyrir öryggi, vellíðan og liðsheild er tungumálið lykillinn.
Markmið verkefnisins var að þróa og prófa leiðir til að efla starfstengda íslenskukunnáttu starfsfólks hjúkrunarheimila með annað móðurmál en íslensku. Sérstaða Málbrúar felst í því að íslenskunámið er tengt daglegu starfi. Starfsfólk eflir orðaforða og æfir samskipti sem það notar í vinnunni, meðal annars við íbúa og starfsfólk. Þannig nýtist námið í raunverulegum aðstæðum og getur aukið bæði öryggi og sjálfstraust starfsfólksins.
Í fjögurra mánaða prófunarfasa Málbrúar tók 41 starfsmaður á þremur hjúkrunarheimilum þátt. Í lokakönnun sögðust 94% svarenda hafa upplifað jákvæðan árangur í íslenskunáminu. Niðurstöðurnar gefa því jákvæðar vísbendingar um gagnsemi þessarar nálgunar.
Fjallað var um verkefnið í fréttatíma RÚV
Nánar um verkefnið Íslenskunám í starfi er sameiginleg ábyrgð
