Elín Hrönn Ólafsdóttir hefur verið ráðin forstöðumaður Hrafnistu í Skógarbæ.
Elín er hjúkrunarfræðingur að mennt með MBA-gráðu og býr hún yfir 20 ára reynslu af stjórnun, rekstri og þróunarverkefnum innan heilbrigðis- og lyfjageirans. Á starfsferli sínum hefur hún gegnt fjölbreyttum stjórnunarhlutverkum þar sem áhersla hefur verið lögð á gæði, öryggi, umbætur og eflingu starfsfólks.
Meðal annars starfaði Elín sem forstöðumaður Maríuhúss hjá Alzheimer-samtökunum þar sem hún bar ábyrgð á daglegum rekstri, faglegri stjórnun og þjónustu við skjólstæðinga og aðstandendur. Elín hefur einnig víðtæka reynslu af rekstri og gæða- og umbótastarfi úr störfum sínum hjá Vistor og Icepharma. Þá hefur hún stýrt alþjóðlegu samstarfsverkefni á vegum Embættis landlæknis sem tengist viðbúnaði og öryggi í heilbrigðisþjónustu.
Við hlökkum til að njóta reynslu, þekkingar og leiðtogahæfileika Elínar í áframhaldandi þróun og eflingu starfseminnar í Skógarbæ og bjóðum hana hjartanlega velkomna til starfa.
