Hrafnista hefur undirritað samstarfssamning við heilbrigðistæknifyrirtækið Helix um innleiðingu á hugbúnaðarlausninni Lyfjavaka fyrir hjúkrunarheimilin sín.
Innleiðing Lyfjavaka er hluti af stafrænni vegferð Hrafnistu og mun lausnin auka öryggi í umsýslu lyfja, tryggja gæði lyfjaskráningar og veita betri yfirsýn við lyfjatiltekt.
Lyfjavaki er rafrænt lyfjaskráningarkerfi sem gerir hjúkrunarfræðingum kleift að halda utan um skráningar á lyfjatiltekt og lyfjagjöfum íbúa. Jafnframt er notast við smáforrit til að staðfesta lyfjagjafir. Með notkun Lyfjavaka er tryggt að rekjanleiki lyfjagjafa sé í samræmi við þær kröfur sem gilda um slíka skráningu.
Betri yfirsýn og aukið öryggi
„Það er ánægjulegt að fá Hrafnistu inn í hóp hjúkrunarheimila og heilbrigðisstofnana sem nýta sér Lyfjavaka. Lausnin okkar stuðlar að betri yfirsýn heilbrigðisstarfsfólk og tryggir nákvæmari og öruggari lyfjagjöf. Það hvetur okkur hjá Helix áfram í þeirri vegferð að bjóða tæknilausnir fyrir hjúkrunarheimlili og aðrar heilbrigðisstofnanir,“ segir Magnús Már Steinþórsson, vörustjóri hjá Helix.
Gunnur Helgadóttir framkvæmdastjóri heilbrigðissviðs hjá Hrafnistu segir að innleiðingin muni hafa jákvæð áhrif á starfsemi heimilanna. „Lyfjavaki á eftir að auka yfirsýn fagaðila á lyfjagjöfum og þar með tryggja betur gæði og öryggi“.
Gunnur Helgadóttir framkvæmdastjóri heilbrigðissviðs Hrafnistu, María Hrund Stefánsdóttir sérfræðingur á heilbrigðissviði, Oddgeir Reynisson framkvæmdastjóri rekstrarsviðs Hrafnistu, Arna Harðardóttir framkvæmdastjóri Helix, María Fjóla Harðardóttir forstjóri Hrafnistu, Magnús Már Steinþórsson vörustjóri hjá Helix, Harpa Hrund Albertsdóttir sérfræðingur á heilbrigðissviði Hrafnistu og Emil Gunnar Einarsson forstöðumaður viðskiptaþróunar hjá Helix.
