Fréttasafn

Á dögunum birtist grein í Víkurfréttum eftir Þuríði Elísdóttur, forstöðumann á Hrafnistu í Reykjanesbæ og Pétur Magnússon forstjóra Hrafnistu. En nýlega kynnti heilbrigðisráðherra að á næstu árum ætla stjórnvöld að reisa 300 ný hjúkrunarrými til viðbótar við þau 250 sem  þegar hefur verið tekið ákvörðun um. Flest nýju rýmanna munu líklega rísa á höfuðborgarsvæðinu en ekki er þó búið að ráðstafa þeim öllum. Í grein sinni hvetja Þuríður og Pétur Suðurnesjamenn til að stíga fram og vinna að bættum hag aldraðra með því að reisa nýtt hjúkrunarheimili á Suðurnesjum.

Greinina má lesa með því að smella á slóðina hér fyrir neðan:

http://www.vf.is/adsent/gripum-taekifaerid-godir-sudurnesjamenn/83156

Á Hrafnistu Hlévangi var verið að ljúka við upplyftingu á aðstöðu iðjuþjálfunar. Þessa aðstöðu geta svo íbúar og aðstandendur þeirra nýtt sér til að eiga notalega stund saman t.d. þegar margir gestir eru í heimsókn. Meðfylgjandi eru myndir fyrir og eftir breytingar.

Í dag komu lestrarvinirnir okkar úr 6. bekk í Víðistaðaskóla að kveðja. Þau hafa komið hingað einu sinni í viku í allan vetur og lesið fyrir sína lestrarvini á Hrafnistu í Hafnarfirði. Í kveðjuskyni sungu þau fallegt lag. Við þökkum þeim kærlega fyrir komuna, sönginn, lesturinn og veturinn.

https://www.facebook.com/handverksheimili/videos/2016853168578559/

Frábærir tónleikar voru haldnir á Hrafnistu Garðabæ Ísafold í dag þegar um 600 manns fjölmenntu á kóramóti. Kórar frá vinaþjóðum okkar Grænlandi og Færeyjum ásamt barnakór Langholtskirkju héldu sannkallaða tónlistarveislu fyrir íbúa og gesti.

Eldeyjarkórinn heimsótti Hrafnistu Nesvöllum föstudaginn 11. maí sl. Kórinn söng þekkt lög af mikilli snilld undir stjórn Arnórs organista.

Sjúkraþjálfunardeild Hrafnistu í Hafnarfirði bauð á dögunum Félagi sjúkraþjálfara í öldrunarþjónustu í heimsókn til að kynna sér starfsemi Hrafnistu. Félagið er stærsta fagfélagið innan Félags sjúkraþjálfara og í félaginu eru sjúkraþjálfarar sem starfa við sjúkraþjálfun aldraðra víðs vegar í þjóðfélaginu, á hjúkrunarheimilum, sjúkrahúsum, einkareknum sjúkraþjálfunarstofum og í heimahúsum. Ásamt sjúkraþjálfurunum, voru aðrir starfsmenn sjúkraþjálfunardeilda/starfsstöðva boðnir velkomnir í heimsóknina, góð mæting varog taldi hópurinn alls 36 manns.

Gestirnir höfðu á orði að móttökurnar hefðu verið glæsilegar og aðstaðan til sjúkraþjálfunar öll til fyrirmyndar. Afar ánægjulegt er hversu margir sáu sér fært að koma í heimsóknina og er hún mikilvæg kynning fyrir Hrafnistu og það faglega starf sem unnið er á deildum sjúkraþjálfara.

Meðfylgjandi myndir voru teknar í heimsókninni á dögunum.  

Karen Sigurðardóttir, íbúi á Hlévangi, færði hjúkrunarheimilinu höfðinglega gjöf. Um er að ræða nýja bocciabolta sem eiga eftir að koma að góðum notum þar sem þeir gömlu voru komnir vel til ára sinna. Við færum Karen og aðstandendum hennar hjartans þakkir fyrir góða gjöf.

Við á Hrafnistu erum mjög lánsöm að eiga sjálfboðaliða sem koma og veita íbúum okkar ómetnalega aðstoð við ýmis verk.

Á Hrafnistu Nesvöllum t.d. koma þrjár yndislegar konur reglulega til okkar sem sjálfboðaliðar. Þær Hrafnhildur og Særún koma og aðstoða okkur við að fara með íbúana okkar í sjúkraþjálfun, en fyrir þá sem ekki vita er sjúkraþjálfunin staðsett í kjallaranum og er því um töluvert langar vegalengdir að ræða fyrir íbúana okkar. Ein kær vinkona okkar hún Imma átti maka á Nesvöllum sem lést í upphafi árs árið 2016 en hefur haldið ómetanlegri tryggð við okkur og íbúa einingarinnar sem eiginmaður hennar var á. Imma kemur oft á fimmtudögum og er að aðstoða okkur við að fara með íbúana okkar í helgistund sem eru í sal þjónustumiðstöðvarinnar og einnig á létta föstudaga sem haldnir eru í salnum. Það er ekki bara þessi verk sem þær létta undir með okkur heldur eru þetta svo mikil gæði sem þær eru að veita íbúunum okkar með samtölum sínum og nærveru. Er þetta ómetanleg aðstoð sem við fáum frá þessum yndislegu konum.