Fréttasafn

Hrafnista bauð starfsfólki sínu í Hafnarfirði, Garðabæ og fjölskyldum þeirra á jólaball í gær. Langleggur og Sjóða sáu um skemmtidagskrána og leiddu um 120 manns í kringum jólatréð. Jólasveinar mættu á svæðið með góðgæti í poka fyrir börnin. Boðið var upp á heitt súkkulaði og tertur og áttu allir notalega samverustund saman.

Hrafnista bauð starfsfólki sínu í Reykjanesbæ og fjölskyldum þeirra á jólaball í gær. Leikhópurinn Lotta sá skemmtidagskrána og leiddi um 150 manns í kringum jólatréð. Jólasveinar mættu á svæðið með góðgæti í poka fyrir börnin. Boðið var upp á heitt súkkulaði og smákökur og áttu allir notalega samverustund saman.

Í gær afhenti Lionsklúbburinn Ásbjörn deild iðjuþjálfunar á Hrafnistu Hafnarfirði myndarlegan styrk.

Hann samanstendur af ýmsu til skynörvunar eins og Inmu hátalara/púða og 3 mismunandi tegundir af kúluábreiðum frá Eirberg, 4 Hasbro's meðferðakisur, rafdrifið píluspjald, stigatöflu og stand frá Ping pong sem hægt er að fara með á milli hæða á heimilinu svo fleiri geti spilað. Bluetooth hátalara, 4 Gemino göngugrindur frá Fastus sem eru sérhannaðar fyrir einstaklinga með Parkinson og nýja stóla fyrir vaxherbergi deildarinnar frá Sýrusson.

Á meðfylgjandi myndum má sjá hluta af gjöfunum og meðferðakisuna Brand í fanginu á nafna sínum.  

Hrafnista Hafnarfirði þakkar kærlega fyrir höfðinglegar gjafir og hlýhug í sinn garð.

Rebekkustúkan Eldey hjá Oddfellow hefur hugsað mjög hlýlega til íbúa Hlévangs með fallegum gjöfum. Nú komu þær færandi hendi með lazyboy stóla sem þær færðu íbúum hjúkrunarheimilisins og við afhendinguna tóku þær eftir að sjónvarpið í setustofunni á neðri hæðinni var frekar lítið að þeirra mati og ætla þær því að mæta með nýtt sjónvarpstæki fyrir jólin. Við færum þeim hjartans þakkir fyrir höfðinglegar gjafir.

Föstudaginn 30. nóvember sl. fór fram verðlaunaafhending í árlegri jólakortasamkeppni Hrafnistuheimilanna. Vinningshafinn í ár er Sævar Hjálmarsson og þökkum við honum kærlega fyrir þátttökuna og óskum honum hjartanlega til hamingju.

Það var Sigurbjörg Hannesdóttir iðjuþjálfi sem afhenti Sævari verðlaun fyrir 1. sætið en hún hefur haft umsjón með keppninni undanfarin ár. 

Fréttablaðið ásamt Fjarðarfréttum, fréttablaði Hafnfirðinga, hafa birt skemmtilega umfjöllun af kótilettukappátinu sem fram fór sl. fimmtudag á Hrafnistu í Reykjavík.

Umfjöllun í Fréttablaðinu:

https://www.frettabladid.is/lifid/ingmaur-sigrai-kotilettukappat-a-hrafnistu?fbclid=IwAR3cV4uW0kNboNdZfGoogRI9eaJ1EjK7LQLm3CKjTvw5h0i519hka97FcOI

Umfjöllun í Fjarðarféttum:

https://www.fjardarfrettir.is/frettir/mannlif/nadi-ekki-ad-sla-hafnfirskt-met-i-kotelettuati?fbclid=IwAR35grd8fdZcGLyQ5_NsYIe32oxwfdiM4ZCQyXg5E5CYZSCP70CJjBdtonk

Í dag var undirritaður verksamningur við Já-verk um uppsteypu og utanhússfrágang þjónustumiðstöðvar og leiguíbúða við Sléttuveg. Í þessum áfanga er um að ræða 60 leiguíbúðir og 1700m² þjónustumiðstöð sem mun tengja saman hjúkrunarheimilið og íbúðarblokkina.

Samkvæmt samningi þessum á uppsteypu þjónustumiðstöðvarinnar að vera lokið um miðjan febrúar 2019 og íbúðanna í lok júlí 2019. Frágangi utanhúss við þjónustumiðstöðina á að vera lokið um miðjan maí 2019 og íbúða í janúar 2020.

Samningurinn var undirritaður í fundarsal Sjómannadagsráðs og ritaði Gylfi Gíslason undir samninginn fh. Já-verks og Hálfdan Henrysson fh. Sjómannadagsráðs.

Viðstaddir undirritunina í dag voru þeir Gylfi Gíslason, Guðmundur Gunnarsson og Heimir Rafn Bjarkason frá Já-verki, Hálfdan Henrysson og Sigurður Garðarsson frá Sjómannadagsráði ásamt Jóni Grétari Magnússyni frá Ölduvör.

Alþingismaðurinn Ólafur Þór Gunnarsson kótilettumeistarinn 2018

Kótilettukeppnin sem fram fór á Hrafnistu í Reykjavík í hádeginu í dag varð æsispennandi þegar alþingismaðurinn Ólafur Þór Gunnarsson bar sigur úr bítum um það hver gæti sporðrennt flestum kótilettum, en alls torgaði Ólafur 15 lettum og er hann því „Kótilettumeistari Hrafnistu 2018“. Eins og spáð hafði verið myndi erfitt reynast að slá Hrafnistumet Birgis Viðarssonar, rafvirkja á Hrafnistu, sem gæddi sér á 19 kótilettum um árið, enda fór það svo að Birgir á enn metið. Þingmaðurinn Guðjón Brjánsson sem boðað hafði komu sína var enn veðurtepptur á Akranesi og komst hann því ekki í keppnina eins og til stóð. Í hans stað hljóp Gústaf Egilsson, pípari á Hrafnistu, í skarðið og endaði hann í 3. - 4. sæti því hann og Birgir hættu eftir 10 kótilettur. Sá sem atti mestu kappi við sigurvegara dagsins var Kiwanismaðurinn Sighvatur Halldórsson sem lauk keppni eftir 14 kótilettur og munaði því aðeins hársbreidd á honum og Ólafi Þór. Stjórnandi keppninnar var Hjalti „Úrsus“ Árnason.

Þjóðarréttur Hrafnistu

Kótiletturnar á Hrafnistu eru löngu þjóðþekktar enda reglulega bornar fram á helstu hátíðum heimilanna en einnig þegar góða gesti ber að garði. Til dæmis hefur lengi verið til siðs að nýr heilbrigðisráðherra hverju sinni komi í heimsókn og snæði kótilettur á Hrafnistu fljótlega eftir embættistöku. Hafa t.d. bæði Svandís Svavarsdóttir og Ásmundur Daði Einarsson, ráðherrar öldrunarmála, litið við í hádegisverð auk Ölmu Möller, sem sl. vor tók fyrst kvenna hér á landi við embætti landlæknis. Fleiri mætti nefna, svo sem Jón Kristjánsson, Ögmund Jónasson og Kristján Þór Júlíusson, fyrrum ráðherra heilbrigðismála, og Dag B. Eggertsson borgarstjóra, en allir eiga gestirnir það sammerkt að minnast heimboðanna og kótilettanna með ánægju þegar endurfundir verða með starfsliði eða íbúum Hrafnistu.

Alls 4.200 kótilettur

Að þessu sinni var blásið til veislunnar í tilefni afmælis Sjóamnnadagsráðs, eiganda Hrafnistuheimilanna, og voru hinar sígildu kótilettur í raspi með tilheyrandi meðlæti á boðstólum í hádeginu á öllum Hrafnistuheimilunum sex. Matreiðslumeistarar Hrafnistu höfðu fyrirfram gert ráð fyrir að í kringum eitt þúsund matarskammtar yrðu reiddir fram á Hrafnistuheimilunum. Talan reyndist mjög nærri lagi en alls voru um 4.200 kótilettur snæddar.

Harpa Gunnarsdóttir fjármálastjóri Hrafnistuheimilanna lætur af störfum

Hörpu Gunnarsdóttur var færður blómvöndur ásamt kveðjugjöf frá samstarfsfólki um leið og Pétur Magnússon forstjóri þakkaði henni fyrir vel unnin störf í þágu Hrafnistu, en Harpa lætur nú af störfum eftir níu ára farsælt og gott starf á Hrafnistu sem framkvæmdastjóri rekstrarsviðs og fjármálastjóri Hrafnistu.  Samstarfsfólk óskar Hörpu velfarnaðar á  nýjum vettvangi og þakkar fyrir ánægjuleg og einstaklega góð kynni.

Meðfylgjandi myndir eru frá kótilettukeppninni.