Fréttasafn

Rebekkustúkan Eldey hefur heiðrað íbúa Hlévangs á Hrafnistu í Reykjanesbæ með mánaðarlegum heimsóknum í vetur. Í gær kom fjöldi vaskra kvenna og bauð íbúunum upp á nýbakaðar vöfflur með rjóma, heitt súkkulaði, konfekt og sörur. Þegar allir voru búnir að næra sig voru þær með jólabingó. Þessi vinskapur er ómetanlegur og við erum svo þakklát þessum yndislegu konum. Þetta er sannkallaður gæðatími sem þær gefa íbúunum okkar. Kærleikskveðjur frá öllum á Hlévangi.

Regina Markeviciene, starfsmaður í býtibúri á Sólteig/Mánateig Hrafnistu Laugarási, hefur starfað á Hrafnistu í 15 ár. Um leið og við óskum henni til hamingju með áfangann er henni þakkað fyrir gott starf og þá tryggð sem hún hefur sýnt heimilinu.

 Á meðfylgjandi mynd eru frá vinstri:  Sigrún Stefánsdóttir forstöðumaður Hrafnistu Laugarási, Regina og Pétur Magnússon forstjóri Hrafnistu.

Sameinuð hefur verið deildarstjórastaða borðsals og ræstingar á Hrafnistu í Laugarási og hefur Auður Björk Bragadóttir, núverandi deildarstjóri ræstingar á Hrafnistu í Laugarási, verið ráðin  deildarstjóri í nýja sameinaða deild. Hún mun taka við stöðunni 2.  janúar 2020. Við óskum henni velfarnaðar í nýju og breyttu starfi og  þökkum jafnframt Sigrúnu Kjærnested, fráfarandi deildarstjóra borðsals í Laugarási, kærlega fyrir samstarfið en hún flytur sig um set og mun taka við sem deildarstjóri borðsals á nýju heimili Hrafnistu við Sléttuveg.

Meðfylgjandi myndir voru teknar sl. föstudag þegar Hrafnista bauð starfsfólki sínu í Laugarási, Ísafold og Skógarbæ upp á purusteik með öllu tilheyrandi í hádeginu. Margar skemmtilegar hefðir fylgja þessum degi þar sem deildir hafa t.d. aðventukaffi, litlu-jól  og fleira.

Hrafnista bauð starfsfólki sínu í Laugarási, Boðaþingi og í Skógarbæ á jólaball í dag. Jólaballið var haldið á Hrafnistu í Laugarási og mættu um 120 manns á ballið. Ævintýrapersónur úr Leikhópnum Lottu sáu um skemmtiatriði fyrir börnin og að sjálfsögðu var svo dansað í kringum jólatréð. Jólasveinar kíktu líka í heimsókn, dönsuðu og sungu og færðu börnunum glaðning í lokin.

Eldeyjarkórinn flutti jólalög í sal þjónustumiðstöðvarinnar á Nesvöllum í dag. Fallegur flutningur og notaleg samverustund. Við þökkum þeim kærlega fyrir komuna.

Venju samkvæmt býður Hrafnista starfsfólki sínu í jólamat. Um er að ræða hádegisverð þar sem boðið er upp á purusteik og tilheyrandi meðlæti. Í hádeginu í gær var starfsfólki í Hraunvangi, Boðaþingi og Reykjanesbæ boðið í hádegismat. Þennan dag er starfsfólki einnig afhentar jólagjafir frá Hrafnistu og margir nota tækifærið og klæðast jólapeysu eða einhverju rauðu í tilefni dagsins. Á þessum degi er jafnan mikil gleði við völd eins og sjá má á meðfylgjandi myndum.

Í dag, föstudag, var svo starfsfólki í Laugarási, Ísafold og Skógarbæ boðið í hádegisverð og munu myndir frá því birtast hér á heimasíðunni eftir helgi.

Á aðventunni er jafnan mikið um að vera á Hrafnistuheimilunum og ýmsir góðir gestir kíkja í heimsókn til okkar. Þessi vika hefur heldur betur verið viðburðarrík. Á Hrafnistu í Laugarási m.a. var glatt á hjalla og áhuginn skein af mannskapnum þegar þær Vigdís Grímsdóttir og Sigrún Sveinbjörnsdóttir kynntu bókina Systa Bernskunnar vegna og Dóra S. Bjarnason kynnti bók sína Brot-konur sem þorðu. Eldri hópur barnakórs Laugarnesskóla, undir stjórn Hörpu Þorvaldsdóttur kom og söng af hjartans lyst við mikinn fögnuð og Kammerkór Mosfellsbæjar söng ljúf jóla- og aðventulög í Skálafelli.

Á Hrafnistu Hraunvangi kom hljómsveit úr Víðistaðaskóla í heimsókn og spilaði jólalög. 5-9 ára börn úr Hjallaskóla sungu fallega fyrir okkur og dreifðu jólakortum.Gaflarakórinn og Kór eldri borgara úr Garðabæ sungu guðdómlega og var menningarsalurinn troðfullur af áheyrendum. Auk þessa var aðventuhelgistund sl. þriðjudag sem sr. Svanhildur Blöndal leiddi. Pétur Magnússon forstjóri Hrafnistu var með jólahugleiðingu og mætti að sjálfsögðu í hátíðarfötunum.

Á Hrafnistu Skógarbæ komu leikskólabörn í heimsókn og bakaðar voru piparkökur. Öllum til mikillar gleði.  

Við þökkum öllum þeim sem hafa lagt leið sína til okkar og kætt okkur með ýmisum hætti kærlega fyrir komuna.