Föstudagsmolar

FÖSTUDAGSMOLAR FORSTJÓRA

Föstudaginn 25. janúar 2019.

Ágæta samstarfsfólk á Hrafnistuheimilunum,

Þorrablótin okkar byrjuðu í dag!

Gleðilegan Þorra kæra samstarfsfólk!

Í dag er bóndadagur, fyrsti dagur hins forna mánaðar, þorra. Þessi árstími er jafnan mjög skemmtilegur hér á Hrafnistu enda blótum við þorrann af miklum móð á öllum vígstöðvum. Fjörið hófst strax í hádeginu í dag þegar Ísafold og Boðaþing riðu á vaðið með hádegisþorrablótum þar sem harmonikkuleikur, söngur og fleira var til gamans ásamt matardásemdunum. Það var mikið fjör á báðum stöðum þegar ég kíkti við.

Í kvöld eru svo risafagnaður í Laugarásnum þar sem engin önnur en söngkonan Guðrún Árný verður veislustjóri. Ræðuhöld verða einnig sem og skemmtiatriði.

Í næstu viku eru það svo Hlévangur og Nesvellir í Reykjanesbæ sem halda hefðbundinn hádegisfagnað og risakvöldfagnaður verður í Hafnarfirði.

Hér er nánara yfirlit en blótin eru auglýst betur á hverju heimili fyrir sig. Gaman, gaman!

Föstudagur 25. janúar

Ísafold – Hádegi

Boðaþing – Hádegi

Reykjavík – Seinni partur

Fimmtudagur 31. janúar

Hlévangur - Hádegi

Hafnarfjörður – Seinni partur

Föstudagur 1. febrúar

Nesvellir - Hádegi

Ég vil einnig nota þetta tækifæri og þakka öllum þeim fjölmörgu ykkar sem koma að bótunum með einhverjum hætti. Það eru margir sem leggja hönd á plóginn á þessum merku dögum, allt frá iðnaðarmönnum við uppsetningu í stóru sölunum, kokkunum sem útbúa matinn sjálfan, þjónum, skipuleggjendum, aðstoðarfólki við blótin og ekki síst starfsfólki inn á deildunum sjálfum en þar eru mörg auka handtök í tengslum við hátíðarhöldin.

Hafið heiður og þökk fyrir.

Auglýsingar um sumarstarfsfólk fara í gang um helgina

Nú um helgina fara í gang auglýsingar frá Hrafnistu um sumarafleysingastarfsfólk næsta sumar. Öll þurfum við jú að komast í sumarfrí og flest okkar geta það ekki nema einhver annar leysi okkur af. Á hverju sumri ræður Hrafnista hátt í 200 sumarafleysingastarfsmenn svo það er ekki seinna vænna en að fara að byrja að ganga í málin.

Um helgina mun birtast stór auglýsing frá okkur í Fréttablaðinu en annars eru aðal staðirnir sem við auglýsu á Alfreð, Facebook og Instagram (já – Hrafnista er að fara á Instagram).

Ekk má samt gleyma því sem hefur samt reynst okkur best og það er þegar þið sjálf, ágæta samstarfsfólk hvetjið fólk í kringum ykkur til að koma til okkar að vinna.

Það er spennandi sumar í vændum!

Gleðilegan þorra og góða helgi!

Bestu kveðjur,

Pétur