Föstudagsmolar

Föstudagsmolar eru vikulegur pistill sem forstjóri Hrafnistu skrifar með upplýsingum til starfsfólks um það sem er efst á baugi í starfsemi Hrafnistuheimilanna. Öðru hverju eru ýmsir úr stjórnendahópi Hrafnistu fengnir sem gestahöfundar föstudagsmola.
 
 
 
 

Föstudagsmolar 5. febrúar 2016 - Pétur Magnússon forstjóri

Old letter
Lesa meira...

FÖSTUDAGSMOLAR FORSTJÓRA

Föstudaginn 5. febrúar 2016.

 

Áhugaverð stefnumótun um öldrunarþjónustu

Í síðustu viku tók ég þátt í áhugaverðum fundi á vegum Velferðarráðuneytis þar sem staðan í öldrunarþjónustu á landsvísu var rædd og hvernig best sé að móta stefnu í málaflokknum til ársins 2035. Fundurinn var hluti af vinnu verkefnisstjórnar, sem tók til starfa síðasta haust. Markmiðið er að greina stöðuna í öldrunarþjónustu og leggja fram tillögur að stefnu til næstu tuttugu ára og þeim aðgerðum sem ráðast þarf í. Verkefnisstjórnin hefur hingað til verið að afla upplýsinga og greina stöðuna. Meðal annars hefur verið skoðuð starfsemin í löndum eins og Kanada, Danmörku og Noregi og því velt upp hvað megi læra af hverju landi fyrir sig. Jafnframt hefur verið unnið töluvert með mannfjöldaspár.

Á fundinum voru fulltrúar frá stjórnvöldum, sveitarfélögum, Landssambandi eldri borgara, Samtökum fyrirtækja í velferðarþjónustu, Sjúkratryggingum, Landlækni og heilbrigðisstofnunum víða um land. Á fundinum kom margt áhugavert fram en fundarmönnum var skipti í vinnuhópa, sem skiluðu til nefndarinnar álitum og ýmsum tillögum.

Það verður spenanndi að fylgjast með þegar niðurstöður verða kynntar.

 

Frí á Fræðsludegi fagstétta

Eitt af markmiðum Hrafnistu er að efla faglega þekkingu starfsfólks. Undanfarið hefur færst í vöxt að einstakar fagstéttir og fagfélög haldi formlega fræðsludaga fyrir sitt fólk. Nú hefur Framkvæmdaráð Hrafnistu ákveðið að fagstéttir geti fengið að fara á sinn fagdag (t.d. Dagur sjúkraþjálfunar, Dagur hjúkrunar) á launum frá Hrafnistu, ef því verður viðkomið. Er þetta aukalega við hefðbundna námskeiðsdaga á vegum Hrafnistu.

Þetta þarf þó að ákveðast tímanlega og í samvinnu við yfirmann og forstöðumann viðkomandi heimilis. Frí sem þessi eru ekki hugsuð fyrir þá sem eru menntaðir í öðru en því sem þeir starfa við á Hrafnistu.

Endilega setjið þetta á bak við eyrað og deildarstjórar ykkar og forstöðumenn gefa frekari upplýsingar.

 

Stórafmæli Hrafnistu 2017

Nú þegar árið 2016 er gengið í garð, styttist í árið 2017 sem er mikið afmælisár í sögu Hrafnistu. Þá verða 60 ár frá því fyrsta Hrafnistuheimilið, Hrafnista í Reykjavík, hóf starfsemi. Jafnframt fagnar Hrafnista í Hafnarfirði 40 ára afmæli á sama tíma.

Það er ekki seinna vænna en að fara undirbúa afmælisárið en þessa dagana er verið að skipa sérstaka afmælisnefnd sem hefur þann tilgang að ákveða hvernig haldið verður upp á þessi merku tímamót.

Nefndin mun þurfa að skila af sér tillögum í vor og svo strax í haust mun undirbúningur afmælisársins hefjast.

 

Starfsafmæli í febrúar

Í febrúar er venju samkvæmt mikið af starfsafmælum. Fyrir utan að ég á sjálfur átta ára starfsafmæli á Hrafnistu eru nokkrir úr okkar glæsta hópi sem fagna formlegum starfsafmælum:

 

3 ára starfsafmæli: Hanna Jónsdóttir á Sólteig/Mánateig í Reykjavík.

5 ára starfsafmæli: Margrét Andersdóttir á Miklatorgi í Reykjavík.

10 ára starfsafmæli: Saloua El. Madani á Vitatorgi í Reykjavík

20 ára starfsafmæli: Jóhanna Stefánsdóttir á Báruhrauni í Hafnarfirði

25 ára starfsafmæli: Kolbrún Pétursdóttir á Báruhrauni í Hafnarfirði og Guðríður Sigurðardóttir deildarstjóri á Sjávar- og Ægishrauni í Hafnarfirði.

30 ára starfsafmæli: Ína Skúladóttir á Bylgjuhrauni í Hafnarfirði.

 

Hjartanlega til hamingju öll og bestu þakkir fyrir góð störf fyrir Hrafnistu gegnum tíðina!

 

Minni svo alla á þá skemmtilegu hefð að klæðast hatti eða búningi á öskudaginn sem er á miðvikudaginn - Góða helgi!

 

Bestu kveðjur,

Pétur

Síða 136 af 177

Til baka takki