Sumri er tekið að halla og núna á næstu dögum fer restin af starfsfólkinu á deildinni að skila sér aftur til vinnu aftur eftir gott og endurnærandi sumarfrí. Við getum ekki annað en brosað allan hringinn yfir því frábæra sumarafleysingarfólki sem við vorum svo lánsöm að fá til okkar á Vitatorg í sumar. 

Örlitlar breytingar verða alltaf með nýju fólki og við gerum öll okkar besta í að aðlaga okkur hvort að öðru til þess að samvinna gangi sem allra best. Við höfum átt gott sumar þó að sólin hafi ekki verið mikið með okkur en með jákvæðni skiptir veðrið okkur ekki miklu máli.
Þar sem ágúst er að verða hálfnaður og hver dagur verði styttri en sá fyrri, þá vitum við að aftur verða breytingar á deildinni hjá okkur. Sumarafleysingarfólkið okkar snýr aftur til náms, en það dásamlega er að þeim fannst öllum svo gaman í vinnunni að þau vilja vinna hjá okkur með skólanum í vetur.
Samstaða hefur verið góð hjá okkur, góð vinátta hefur myndast milli starfsmanna sem gerir líka vinnuna léttari og skemmtilegri. Það er einstaklega ánægjulegt að hluti starfólks okkar stefnir að frekari menntun innan heilbrigðisgeirans, hvort sem stefnan sé tekinn á sjúkraliðann, hjúkrunarfræðingin eða jafnvel lækninn. Það er okkar markmið að halda vel utan um nemana okkar með því að grípa öll námstækifæri sem kunna að koma upp og veita þeim verkefni sem snúa að þeirra námi. Það er alltaf nóg að gera á hjúkruanrdeildum.

 

Ég verð að segja það að mér finnst gaman og gefandi að vinna í öldrunarþjónustu. Ég fór að vinna á Hrafnistu í Reykjavík í maí 2016 sem deildarstjóri á Vitatorgi og get ekki sagt annað en að Hrafnista býður manni upp á gott vinnuumhverfi sem ég mæli hiklaust með. Það er yndislegt að sjá hvað unga kynslóðin sem kemur hér til vinnu finnur sig í þessu starfi og um leið áttar sig jafnvel á því að heilbrigðismenntun er það sem þau vilja mennta sig í.

 

Takk fyrir gott vinnusumar, ég er farin í sumarfrí eftir helgi.

 

Anna María Friðriksdóttir

Deildarstjóri á Vitatorgi

Hrafnistu Reykjavík