Afmælishald í Reykjanesbæ og Kópavogi
Mars er alltaf skemmtilegur tími í sögu Hrafnistu, sérstaklega þar sem nýjustu Hrafnistuheimlin hafa opnað á þessum árstíma.
Í fyrra hófum við starfsemi í Reykjanesbæ í mars þar sem við tókum við Hlévangi 1. mars en Nesvellir opnuðu formlega 14. mars. Þessum tímamótum höfum við verið að fanga undanfarið en mikið var á dýrðir í Reykjanesbænum þegar haldið var upp á eins árs afmæli okkar þar. Kjartan Kjartansson bæjarstjóri heimsótti okkur meðal annars og boðið var upp á glæsilegar veitingar og tónlistaratriði.
Í gær fagnaði svo Hrafnista í Kópavogi 5 ára afmæli sínu. Opnun heimilisins markaði mikil tímamót í sögu öldrunarþjónustu á Íslandi.
Annars vegar er heimilið það fyrsta sem sérhannað var með litlar, heimilislegar einingar að leiðarljósi. Hafa nánast öll hjúkrunarheimili á Íslandi, sem byggð hafa verið síðan, tekið mið af Hrafnistu Kópavogi. Hins vegar er það spennandi hugmyndafræði sem við höfum þróað.
Vegna tímamótanna var boðið upp á tónleika með Ragga Bjarna meðan afmælisgestir gæddu sér á afmælistertu. Einnig kíktu Kristján Þór Júlíusson heilbrigðisráðherra og Ármann bæjarstjóri í heimsókn, skoðuðu starfsemina og fengu sér að borða lambahrygg með heimilisfólki á Spóalundi.
Ég vil nota þetta tækifæri til að þakka öllum sem lögðu hönd á plóg við afmælishöldin en í mörg horn er að líta svo allt gangi upp.
Enn og aftur til hamingju með afmælin Kópavogur og Reykjanesbær!
Ráðstefnudagurinn okkar er á þriðjudaginn!
Ég minni ykkur svo öll á árlegan ráðstefnudag Hrafnistu núna á þriðjudaginn. Eins og venjulega er boðið upp á glæsilega og spennandi dagskrá þar sem fræðsla af ýmsu tagi er í boði. Samskonar dagskrá er í boði á Hrafnistu í Reykjavík og Hafnarfirði og eins og venjulega getur starfsfólk valið úr þá fyrirlestra sem það vill hlusta á. Dagskráin hefur verið hengd upp og auglýst á helstu auglýsingatöflum en meðal annars er í boði fyrirlestrar um stjörnuspeki og samskipti á vinnustað auk þess sem Vilborg Arna pólfari miðlar af reynslu sinni.
Þó ég viti að töluvert sé um veikindi þessa dagana vona ég að sem allra flestir nái að nýta sér ráðstefnudaginn og taka þátt með virkum hætti. Þessi dagur er jú fyrir okkur, starfsfólk Hrafnistu.
Þetta verður bara gaman!
2.500 páskaegg á leiðinni!
Samkvæmt áræðanlegum heimildum er starfsfólk NóaSírus að leggja loka hönd á 2.500 gullegg fyrir Hrafnistuheimilin. Líkt og síðustu ár hefur Hrafnista látið framleiða fyrir sig páskaegg í minnstu stærð með sérstökum Hrafnistumálshætti. Hugmyndin með þessu er að alir í Hrafnstusamfélaginu (starfsfólk, heimilisfólk og góðvinir) fá eitt egg í tilefni páskahátíðarinnar. Vísvitandi er ekkert sælgæti inn í eggjunum heldur einungis hugmyndin að virkja þann skemmtilega páskasið að fólk fái smá súkkulaði og sinn páskamálshátt, til hátíðarbrigða.
Eggjunum verður dreift í vikunni fyrir páska og við treystum því að allir leggi sitt að mörgum að þau verði kláruð fyrr en síðar!
Starfsafmæli í mars
Nú í marsmánuði fagna nokkrir glæstir starfsmenn formlegum starfsafmælum hjá okkur. Þetta eru:
3 ára starfsafmæli: Í Reykjavík eru það Thelma Rut Jónsdóttir á deild A3/A4, Jóhanna Gunnheiðardóttir á deild DEFG-3 og Ingunn Þorsteinsdóttir á deild H2. Í Hafnarfirði eru það Anna Katarzyna Kosmala á Sjávar-/Ægishrauni, Sunneva Birgisdóttir á Báruhrauni og Stefán Þórsson læknanemi. Loks er það Ragnhildur Tinna Jakobsdóttir í Kópavogi.
5 ára starfsafmæli: Jóhanna Olgeirsdóttir á deild EFG-2 í Reykjavík. Í Kópavogi eru það Tinna Huld Karlsdóttir, Andri Freyr Þorsteinsson, Karen Irena Mejna, Erla Ósk Sigurðardóttir og Anna Valdimarsdóttir.
15 ára starfsafmæli: Guðrún B. Ásgeirsdóttir á Sjávar-/Ægishrauni í Hafnarfirði og Josephine Manzanillo Ramos á deild H1 í Reykjavík og Kristín Anna Sverrisdóttir í launadeild.
Við óskum þeim öllum hjartanlega til hamingju með áfangann og tryggð við Hrafnistu!
Góða helgi!
Pétur